Shillong Nailar 11: Ka Bharatiya Janata Party (BJP) Meghalaya ka la pynrem jur halor ka jingkynnoh ba ka don ka jingpyndonkam da ka bor pyrshah ia ki samla pule kiba pynlong jingiakhih ha Ranchi ha kaba iadei bad ka pule puthi bad ka ioh kam ioh jam.
U General Secretary ka BJP u Bah Wankitbok Pohshna u la ong ba ki samla pule ki ba shim bynta ha katei ka jingiakhih ki la shah pynshitom ha ki pulit watla ki la iakhih da kaba jaijai.
U Bah Wankitbok u la kam ba la buh ïa ki jingker nar ha ka lynti ba iaid ki nongïakhih bad ki pulit ki la pyndonkam da ki bom pynsat khmat, ki suloi um bad bom lathi ban pynpra ïa ki. U la kynnoh shuh shuh ba ki don ki samla pule kynthei kiba la ujor ba ki jain phong jong ki ki la jot ha ka por ba ki ialeh pyrshah.
Utei u nongialam ka BJP u la khot ia ka sorkar Congress-Jharkhand Mukti Morcha (JMM) ba kan tuklar ia ki jingeh jong ki samla pule kiba iakhih bad ban pynthikna ba kan don ka jingkitkhlieh ia kino kino ki jingkynnoh ba ki leh palat pud.
U Pohshna u la buh jingkylli ruh ïa ka jingkynthoh jong u Rahul Gandhi halor ki jingïakhih, da kaba kynnoh ba une u nongïalam ka Congress u la shim ïa ki nongrim bapher bapher halor ki kam kiba ïadei bad ki samla pule katkum ka jinglong jingman jong ka saiñ hima sima.
U la buh jingkylli ia ka jingsngap jar u Rahul Gandhi halor ki jingiakhih ha Ranchi bad u la ong ba ki samla pule ha Jharkhand ki la pynpaw ia ka jingsngewkhia halor ki mat ba kynthup ia ki jingkynnoh thok ha ka thung kam bad ka jingllait tuh ki kot jingkylli.
Ka BJP ka la kynthah ruh ia ka Congress halor ka jingkren jong ki ha Parliament. U Bah Pohshna u la kynnoh ba u Rahul Gandhi u la pynkylla bunsien ia ki jingdawa jong u, ha kaba u la sdang da ka jingkhot ban iehnoh kam ia u myntri ka pule puthi, bud sa ka jingdawa ban iakren halor ka National Eligibility cum Entrance Test (NEET), bad hadien pat u la pan ia ka jingpynshai na u myntri kam poh iing jong ka sorkar pdeng ha kaba ia dei bad ka jingjia Jantar Mantar.
Ka BJP ka la kynnoh shuh shuh ia ka Congress ba ka leh politik halor ki mat kiba iadei bad ki samla pule bad ki samla.
Ka seng ka la pynpaw biang ia ka jingkyrshan ia ki samla pule kiba iakhih ha Jharkhand bad ka la khot ia ka sorkar jylla ban weng ia ki jingeh jong ki lyngba ka jingiakren paidbah bad ka jingleh kaba dei.
