Shillong Risaw 14: Ka Directorate of Mineral Resources ha ka jingiatreilang bad ka ophis u Deputy Commissioner, East Khasi Hills bad East Jaintia Hills District hynne ka sngi ka la kynmaw kyrpang ia ka jingdap 10 snem jong ki District Mineral Foundation ha ka jylla
Na ka liang u Myntri Rangbah ka jylla haba kren ha kane ka sngi u la pynpaw ba ka sorkar jyla ka la shim khia bha haba ia dei bad ki khajna ba mih na ka kam marpoh khyndew kaba ki District Mineral Foundation (DMF) ki la leh na ka bynta ka jingmyntoi ki paidbah.
U Myntri Rangbah ka jylla u la ong ba ki marpoh khyndew ki dei ki ba don kam bha ha ka ioh ka kot ka jylla, ha kaba lyngba ka khajna ba ki ioh na ki, ka sorkar ka shim ia ki lad ki lynti ban pynneh pynsah ia ka mei mariang ryngkat bad ka jingkiew ha ka ioh ka kot.
Ha kine ki shi phew snem ba la dep ka District Mineral Foundation ka la pyntri kam ia ka pisa kaba ₹181 klur ha ka jylla , ha kaba 923 tylli ki projek la mang pisa ha kylleng kan jylla bad 542 tylli la lah ban pyndep.
U la ong ruh ba ia kane ka pisa kaba la mang la pyndon kam ha bun ki bynta, kata ban shna ia ki kamra klas, ban pynbna ia ki jaka ai jingsumar, ka umbam umdih, ki jingkieng iaid kjat kiba pyniasoh na ka wei ka shnong sha ka wei pat, bad ruh ban pynbha ia ka mei mariang kum ka jingpynneh ia ki tyllong um bad ban thung dieng ha ki jaka ba tih maw.
Ha kane ka sngi na ka liang u Myntri rangbah ka jylla u la sam ruh ia ki khusnam sha ki samla ki ba la jop ia ki jingiakop kiba pher bapher .
