Shillong Jylliew 17: Ka All Meghalaya Domestic Workers Union ka ai khublei sngi burom basuk bakmen ia baroh ki nongtrei iing briew ha kane ka International Domestic Workers Day.
Haba ia kren bad ki nongthoh khubor ka Vice President jong ka AMDWU ka Kong Elbina Mary Nongkhlaw ka la ong ba baroh ki dei ban ia ioh bynta lang la ka dei ha ka kam ka jam ne ha ka imlang ka sahlang , ha kine ki snem ba la dep ngi ju iohi ba ia ki kynthei ki ju shah ban bein bad ioh ia ka jingduna ha ka pule ka puthi.
Ka la ong ruh ba ka Gender Justice ka mih sha khmat ban ai ia kata ka jingiaryngkat bad ban ym don ka jingnoh shilliang ha ka imlang ka sahlang. Haba phai sha ki ba bylla iingbriew da ki hajar ngut ki longkmei ki im da kaba shu bylla iing briew, bad haba ki trei sha ki iing ki sem ki sngew dei ba ma ki ruh ki dei ban ioh ia kata ka hok bad ban shngain ha ki jaka trei ka jong ki.
Ka la ong ruh ba lada peit ha kine ki sngi shibun ki nongtrei ki mat ia kita ki jingshah leh tohmet, ha kaba ka la pynpaw ruh ia ka jingjia kaba dang shu jia shen, ka la ong ba ngi don kam ban mih sha khmat lada don ki jingshah ban bein.
Ka Union ka ju iai dawa na ka por sha ka por na ka sorkar ban don la ka jong ka welfare Board na ka bynta ki Domestic workers namar ki sngewthuh ia ka jingshngain lada ki don ia la ka jong ka Board, bad kumba ioh lem ia ka hok kum ki wei ki nongtrei.
Ka kong Nongkhlaw ka la ong ba bun ki longkmie ki duna ia ka jingnang jingstad, hynrei ka Union ka lum ia ki bad trei ban dawa ia ka hok jong ki nongtrei bapher bapher, ka Union ka kyntu ia baroh kiba trei iing briew ban wan sha khmat ban pynrung kyrteng bad ka union na ka bynta ka jingbha ka jong ki, ka union ka ju leit ban ai jinghikai bad pynsngewthuh sha baroh ia ka jingdonkam ban register bad ka kynhun.
Haba ia dei bad ka jingsiew ia ki nongtrei bylla sngi ka union ka dawa ba ki trai iing ki dei ban siew 600 tyngka shi sngi ia kito ki ba trei baroh shi sngi ha iing jong ki bad na ka bynta kito ki ba trei kynta ka Union ka dawa ba ki trai iing ki dei ban siew 3,000 tyngka shi bnai na ka bynta kito ki ba trei shi kynta shi sngi.
