Shillong Nailur 10: Ka kot kaba la thoh shaphang ka jingim, ka jingnoh synniang ha ka sain pyrthei bad ka jingshim bynta ha ka jingthaw ain u myntri rangbah barim ka jylla u Bah Brington Buhai Lyngdoh la pyllait mynta ka sngi ha ka prokram ba la pynlong ha iingdorbar thawain ka jylla ha ka sngi Palei na ka bynta ban ai burom ia une u nongialam uba ki buit treikam bad ka jinghsakri jong u ia ki paidbah kan dang iai bteng haduh kane ka pateng ba mynta.
U lamphang ka iingdorbar thawain ka jylla u Thomas Sangma u la pyllait ia kane ka kot ha kaba u la batai ba u Bah BB Lyngdoh udei u nongialam ba khraw uba wanrah ka bynta ba kongsan ban saindur ia ka sain pyrthei ha Meghalaya bad ka jingwanrah ia ka synshar paidbah.
Ka jinglah jong u ban pyndap ia ki jingmut bapher bapher, ban tei ia ka jingiasngewthuh jingmut bad ban trei ha kylleng ki jingiapher ha ka sain pyrthei ka la pyni ba ka jingiakren bad jingpyniasuk ka lah ban pynkhlain ia ka jingsynshar paidbah, u la ong.
U la ong uba u Bah BB Lyngdoh u dei uba la niew kum u kpa ka sain pyrthei ba iatreilang ha meghalaya. U la ong ba u Bah BB Lyngdoh u la long u myntri rangbah ka jylla ha ki 4 samoi treikam ha ki bynta bapher bapher jong ka jingkiew ha ka saiñ hima sima jong ka Jylla. U la kdew ba ka jingthmu jong u ka iaid shabar jong ki jingpyrkhat sain pyrthei kiba mardor sha ki mat kiba ktah ia ki nongshong shnong ba rit paid, kynthup ia ka khyndew ka shyiap, ka kamai kajih, ka roi ka par, ka ain bad ka shongsuk shongsain, ki lad ki lynti bad ka jingiatylli ha ka imlang sahlang.
