Shillong Jylliew 04: Ka Langsning Football Club bad ka Nongkseh SSCC ki la long ba la pynkhreh ban iakhun ia ka final ha ka 5th Meghalaya State League 2026 ka ban long ha ka 5 tarik u Jylliew 2026 ha SSA Stadium kaba ha Polo ha ka por 6 baje janmiet.
Haba pynpaw ha ki lad pathai khubor shi sngi shwa ban sdang katei ka jingiakhun final, u coach ka Langsning u Bah Khlaiñ Pyrkhat Syiemlieh lem bad u coach ka Nongkseh u Bah Richard Nongneng ki la pynpaw ia ka jingangnud ban ialehkai bha na ka bynta ban iaknieh ia ka nam lahduh.
Ha kane ka sngi na ka liang u kapten ka Langsning u Atlanson Kharmaw lem bad u kapten ka Nongkseh u Hardy Cliff Nongbri, ki la pynpaw ia ka jingkhmih lynti ban kin ialehkai bha naduh kaba sdang namar ka jingangnud ka jong ki la long na ka bynta ban rah ia ka trophy nam lahduh.
Kumba ka paw ka Langsning ka dei ka lahduh jong ka Shillong Premier League jong u snem 2025, katba ka Nongkseh ka dei ka kynhun kaba la kiew kyrdan sha ka SPL hadien ba ka la bat ia ka nam lahduh ha ka First Division jong u snem ba la lah bad ka la rah ruh ia ka trophy nam lahduh ha ka Champions Cup ba la pyniaid da ka Shillong Sports Association ha u snem ba la lah.
