Shillong Jylliew 11: Ka sorkar Meghalaya ka la pynkhreh ban pynlong ia ka jingialang ka North East India Infrastructure summit ban pynlong ha Lariti International Centre for Performing Arts & Culture, Mawdiangdiang, Shillong ha ka 15 bad 16 tarik Jylliew 2026, ban wallam lang ia ki nongmihkhmat na baroh ki jylla ka thain shatei Lammihngi, ki myntri sorkar Pdeng, ki nongialam jong ki karkhana, ki nongbei tyngka ban shim ia ka lad na ka bynta ban pynroi ia ka htian bad ban bei tyngka.
Haba kren sha ki lad pathai khubor u Commissioner & Secretary ka Government of Meghalaya ka tnad Public Works Department, Sanjay Goyal u la ong ba kane ka jingialang ka dei na ka bynta ka jingthmu ban iakren na ka bynta ban bei tyngka ha ka thain shatei lammihngi na ka bynta ki jingtei ba kongsan bad kane ka dei ka sienjam ba nyngkong kum kane ka jingialng ha ka thain.
U Goyal u la pyntip ruh ba u myntri rangbah ka jylla u Conrad Sangma u la phah jingthoh sha ki myntri rangbah jong baroh ki jylla ka thain shatei lamihngi ban khot sngewbha ia ki sha kane ka jingialang, kumjuh ruh u la khot sngewbha ia ki katto katne ki myntri ka sorkar pdeng, ki Chief Secretary ki jylla Northeast, ki Union Secretary. U la kdew ba ka sorkar ka la dep ban ioh ia bun bah ki jingmynjur na kine ki nongiashim bynta ba kin wan sha kane ka jingialang.
Kane ka summit ka thmu na ka bynta ki kam ba kongsan ba kynthup ki jingpyniasoh, ki kam jngohkai, ki jingpynpoi mar, ki jingpyniaid liengsuin, ki jingtei digital, ki jingpynmih marbam bad ki jingbei tyngka na bynta ki public-private partnership (PPP). Katkum ka jingong u Goyal, kane ka jingthmu ka thmu ban tei ïa ka jinglong ba la pynkhreh kaba nang kiew jong ki jylla jong ka thaiñ Shatei Lam Mihngi ban khring ïa ki nongbei tyngka bad ban pynsted ïa ka jingroi ka ïoh ka kot ha ka ri baroh kawei.
Palat 800 ngut ki nongshim bynta na bun ki karkhana kin wan ha kane ka jingialang. La thmu kumba 8 haduh khyndai tylli ki jingialang ba iadei bad ka phang ban iakren ia ki lad ki lynti, ki jingeh, bad ki lad ban bei tyngka kiba iadei.
Nalor kata, ki tnad sorkar pdeng kin buh ia ki dur ki dar kiba pynpaw ia ki jingthmu pynroi bad ki jingnoh synniang jong ki sha ka thain shatei lamihngi.
U Goyal u la ong ruh ba kane ka jingialang kan plie ka lad ban sngewthuh ia ka roi ka par ban sa sdang ha kylleng ka thain bad ban trei na ka bynta ban wanrah ia ka Northeast kum kawei na ki thain kaba kiew bad ban ioh jingithuh ha kylleng ka ri.
