Shillong Jylliew 06: Ka Seng Samla Shnong Laitkor Pyllun ha ka 06 tarik u Jylliew, 2026, ka la pynlong ïa ka jingïalang ban plie paidbah ïa ka Ambulance ba thymmai bad ruh ban rakhe ïa ka World Environment Day 2026.
Ïa ka jingïalang la pynïaid da u Bah Michael Wanshong, President, ha kaba u Bah Richmond Richard Mawrie, Vice-President, ula ai ïa ka jingkren pdiang sngewbha sha baroh kiba wan jingïashim bynta.
Ka jingplie paidbah ïa ka Ambulance bad ka jingkyntiew ia ka lama la shim da u Bah Tosanbha Marweiñ, BDO ka Mylliem C&RD Block kum u kongsan ryngkat bad u Bah Johnystar Mawrie, CEO jong ka JM Foundation, uba dei u Adviser ka Seng uba ha ka jingialang u la kren halor ka jingdonkam bad ka jingshakri jong ka Ambulance ha ka imlang sahlang.
La pynkup burom ruh ïa ki doktor ba la noh synñiang ha ka liang ka koit ka khiah, kata ïa u Dr. Banrap Syiemlieh bad Dr. Mangkara Kharkongor.
Hadien kata, u Bah Kitbor Kharkongor, Chairman ka Laitkor Dorbar Pyllun, ula ai ïa ka jingkren halor ki kam shnong bad ka jingdonkam jong ka jingïatreilang na ka bynta ka bha ka miat jong ka shnong.
Ha kane ka sngi, la pynpaw ruh ïa ka jingsngewnguh sha u BDO ka Mylliem C&RD Block namar ka jingïarap bad ka jingkyrshan ha ki kam pynroi jong ka thaiñ.
U Bah Tosanbha Marwein, ula ai ïa ka jingkren kyrpang halor ka World Environment Day, da kaba ban jur ïa ka jingdonkam ban sumar ïa ka mariang, ban thung dieng bad ban ïada ïa ka mei mariang na ka jingjaboh.
