Shillong Jylliew 06: Ka ophis jong ka Commissioner for Persons with Disabilities , ka Social Welfare Department, jong ka sorkar Meghalaya,ha ka jingiatreilang bad ka Pt. Deendayal Upadhyaya National Institute for Persons with Physical Disabilities (Divyangjan) jong ka Ministry of Social Justice and Empowerment, Government of India, bad ka Instalimb India Pvt. Ltd, hynne ka sngi ki la plie paidbah ia ka jingai jinghikai kaba ar sngi halor ka “Hands-on 3D Prosthetic Training na ka bynta kito kiba la duh noh ia ki kjat jong ki ia kane ka program la pynlong ha U Soso Tham Auditorium, Shillong.
Haba ia kren bad kito katne ki nongioh jingmyntoi ha kane ka sngi ki la pynpaw ia ka jingsngew kmen ba ka sorkar ka la ai jingiarap ia ki ba kin lah ban ieng ha la ki jong ki kjat.
Na ka liang ka kong Bawanhun Khongwir ka la pynpaw ia ka jingsngew kmen ba ka la ioh ia kine ki kjat ki ban ia rap ia ka ban iaid sha rum sha nengbad ba kan lah ban pyndep ia ki kam ki jam kiba man ka sngi.
Ka la ong ba wad la ka la duh noh ia ka kjat naduh dangrit kane ka dei ka sngi ba nyngkong ha ka ba kan ioh ia kine ki kjat bad ban ioh pyndon kam ia ka.
Na ka liang ka Samla Nazareen Nongkhlaw kaba dei ka nongshong shnong na Mawiong Umjapung ka la ong ba kine ki prosthetic limb ki long ki ba biang bha bad kiba suk ban pyndonkam.
Kane ka samla ka la ai khublei ia ka tnat bad ia ki nongpyniaid kiba la ai ia kine ki jingdonkam khlem da siew pisa , ha kaba kane kan iarap ia ka ban iaid ban ieng.
Haba ia kren bad u wei na ki hep rit uba la ioh jingmyntoi u Remender Talang na ka shnong Shilliang Myntang, u la dap da ka jingsngew kmen ban ioh ia kine ki kajt namar baroh shi katta u pyndonkam da u siej ban iaid sha rum sha neng hynrei kane ka jingioh ia kine ki kjat kan long ka jingkyrkhu ia u ba un lah ban iaid ban ieng. Kata ruh khlem da don kam ban siew eiei ruh em.
