Shillong Jylliew 23: Ka United Democratic Party ka la pynpaw ïa ka jingskhem ba ka Voice of the People Party (VPP) ka lah ban nym ïoh ïa kajuh ka jingkylla ha ka saiñ hima sima kumba la sakhi ha ka elekshon Lok Sabha 2024 ha ki elekshon ban wan, kynthup ïa ka elekshon shiteng samoi ban wan jong ka Shillong Parliamentary seat.
U general secretary ka UDP u Bah Titosstarwell Chyne ha ka sngi Nyngkong u la ong ba ka party ka la dep ban pynbna ia u kyrtong jong ka bad ka la sdang ruh ban khring ia ka jingkyrshan lyngba ki district bad ki circle unit jong ka, wat la ia ka por elekshon ym pat lah ban pynbna.
U bah Titos u la ong ba ki jingai jingmut ba la ioh da ka seng ha ki jingiakren paidbah dang shen ki pyni ba ka jingsngew jong ki nongthep vote ka nang kylla bad ba ka don ka jingpdiang ia u kyrtong ka UDP kaba nang kiew.
U la ong ruh ba ki jinglong jingman ha ka kam sain pyrthei kam ju long kiba neh bad ki lah ban kylla na kawei ka elekshon sha kawei pat.
Katkum ka jingong une u nongialam ka UDP, ka jinglong jingman jong ka sain pyrthei mynta ka pher na kaba long ha ka por elekshon Lok Sabha ha u snem 2024 bad ka party ka don ka jingkyrmen ba bha ha kane ka elekshon shiteng samoi ban wan.
