Shillong Jylliew 08: Ka Synjuk Samla Katholik Nativity Parish Mawkyrwat Shillong Unit ha ka 6 Tarik u Jylliew ka la pynlong ia ka jingthung dieng ha ka Shnong Laitmynsang Mawkynrew Block.
Ha kane ka sngi ki Samla ha ryngkat ki nongshong Shnong ki la ia trei lang ban pynneh pynsah ia ka mei mariang, la sdang ia kane ka sngi da ka program ba lyngkot ha kaba la ia don lang ka Kong Balentina T Lamare ( Block Project Manager Meglife BPMU Mawkynrew ), kaba la kyntu Kynpham ia ki samla bad ruh ia ki nongshong Shnong halor ka jingdon kam ban pynneh pynsah ia ki khlaw ki btah na ka bynta ka lawei ka ban wan.
Ka la ong ruh ba ka sngewthuh ba ha ka sngi shuti ki samla pule ne kiba la treikam ki kwah ban shong ba ki iing ki sem hynrei phi ki samla phi la wan sha khmat ban pynlong ia kane ka sngi pynneh mariang kaba jop.
Phi thrang ban iohi ia ka jingjyrngam jong ki dieng ki siej, bad ban pynneh ia ki, kane ka dei ka nuksa kaba bha tam.
Na ka liang u Sordar ka Shnong Laitmynsang u bah Shot Nongrim u la pynpaw ia ka jingsngew kmen ba ki samla ki peit ia ka Shnong jong ki ban pynlong kaba jyrngam.
U la ong ruh ba ka jingthmu jong ki samla ka long kaba biang bha namar ban pynneh pynsah ia ka mariang donkam ha kane ka juk kaba mynta ka long kaba don kam bha.
U la ai khublei ia ki samla ka Mawkyrwat Parish Shillong Unit kiba la kloi ban pynsngew thuh ia ka jingdon kam ban thung dieng.
Ka mei mariang mynta bad mynshuwa ka la pher haduh kata kata ban pynlong biang kum ha ki por ba mynshuwa don kam ban thung dieng bad sumar bha ia ki.
Ha kane ka sngi la synran lang ia ki Samla da u Fr. Aiborlang Nongsiej spiritual director, u baj John Gilbert Nonglong (Adviser), Bah Albert Marwein (Adviser), Donboklang Marwein (Adviser), u Samla Radianstar Snaitang (Accountant BPMU meglife),, u Samla Welbokstar Lyngkhoi (President SSKNPM Shillong Unit Bad Assistant Manager Meglife BPMU Mawkynrew), u Bah Noren Suting (Secretary Laitmynsang & VCF VPIC), ka Kong Aitihun Suting (Member Village Organisation Laitmynsang), ka EC jong SSKNPM Shillong Unit, bad ki Nongshong shnong bad VPIC Members Laitmynsang, VO & SHG Laitmynsang, ki Nongkyrshan bad Nongaisngewbha, bad Ki para samla ka Nativity Parish Shillong Unit.
Ha kane ka sngi ka la don ruh ka jingiabam ja lang bad ki nongshong Shnong.
