Shillong Jylliew 08: U nongialam ka NPP u James PK Sangma hynne ka sngi 8 tarik Jylliew 2026 u la leit ban thep kyrteng ialade kum u kyrtong na ka bynta ban iakhun ia ka ilekshon MP ha Rajya Sabha na Meghalaya ha ka jingsynran ki nongialam bahakhmat bad ki nongmihkhmat jong ki constituency bapher bapher kiba don lang hapoh ka sorkar Meghalaya Democratic Alliance.
Haba kren sha ki lad pathai khubor hadien ba la dep thep kyrteng , u James Sangma u la ai khublei ia ki paidbah nongshong shnong ka jylla, ia u Myntri Rangbah ka jylla u Conrad K Sangma, ki symbud myntri rangbah bah Sniawbhalang bad Bah Prestone, ki myntri sorkar, ki nongthaw ain, ki paralok ba snohkti lang bad ka NPP kata ka UDP, ka HSPDP, ka BJP BAD U MLA shimet kiba la kyrshan ia u na ka bynta ban long kum u kyrtong sha ka ilekshon Rajya Sabha.
U James u la ong ba ka jingpynbit pynbiang na ka bynta ka ilekshon la dep lut kaba sah mynta ka long ha ki tyrpeng jong u ban kit ia ka lyngkor. U James u la ong bun ki mat jingdawa kiba iadei bad ka jylla kiba dang sahteng la slem bha bad donkam ka jingialeh ban pynsngew ia ki. U la ong ba un sa kren ia kine ki mat ha Rajya Sabha khang ba ka sur ki paidbah ka Meghalaya yn iohsngew ha ki rynsan jong ka ri.
Haba kren halor ka jingjied ia u kum u kyrtong u James u la ong ba u burom ia kaei kaba la shaniah ha u bad u kular ba un shakri ia ki paidbah ka jylla Meghalaya da ka jingaiti lut bad jinglong ba shisha.
U la ong ruh ba ka 8 tarik Jylliew ka dei ka sngi ba khatduh ban thep kyrteng, u James u la ong ba lada un shah jied khlem don ba ialeh pyrshah, un shim ba ka long ka kabu bad ka burom ban mihkhmat ia ka Meghalaya ha Rajya Sabha. Ha kum kane ka lad, u la ong, un shim ia lade kum uba mihkhmat ia ka jingmyntoi jong ka jylla baroh kawei.
Haba jubab ia ka jingkylli hato un wanphai biang sha ka sain pyrthei sha ka jylla na ka bynta ka elekshon ban wan, u James u la ong ba ka dang kloi palat ban shim ia kum kane ka rai bad ba yn sa bishar bniah ia ka jinglong jingman ha ka por kaba biang.
U la kdew ruh ba ka por treikam jong u dkhot jong ka Rajya Sabha ka long hynriew snem bad u la kdew ruh ïa ka jingthmu jong u ban pyndep pura ïa ka samoi treikam. U la kynthoh ba kan long kaba sngewsih ban phah ia u briew sha ka iing dorbar ba ha khlieh duh tang ba kin wan phai shwa ban pyndep ia ki kamram bad ban pynkut ia ka samoi treikam jong ki sha Parliament.
