Shillong Naitung 11: Ha ka kawei ka jingjia ba sngewsih 5 ngut ki briew ki la iap katba ki dang mut ban pynkhuid ia ka pung um kaba la dep tih kaba jylliew kumba 25 phut eiei. Kane ka jingjia ka la jia hynnin ka janmiet sngi thohdieng ha kawei ka iing ha ka shnong Lapalang
Haba kren sha ki lad pathai khubor u Rangbah Shnong ka Lapalang u Bah Pyndap Sohtun u la iathuh ba kane ka jingjia kadei na ka daw ba ki pyndonkam da ka diesel pump ban pynkhuid bad ban sei ia ka um na shapoh kaba la pynlong ba kin ioh ring mynsiem da ka lyer bih namar ka jingduna ka oxygen shapoh bad ki la kyllon hangta.
U la iathuh ba kiba pynkhuid ia katei ka pung ki don 4 ngut katba uwei pat u la ioh ban mih ban pyrta jingiarap bad lai ngut ki la khlad noh shapoh. U la iathuh ba ki 2 ngut kiwei pat kiba la khlad kidei kiba sah marjan ha katei ka iing kiba la mut ban leit iarap mar syn ioh sngew ia ka jingpyrta jingiarap utei uba la ioh mih napoh ka thliew, hynrei kaba sngewsih ka long ba kitei ki 2 ngut ruh ki la ngat lang ha ka juh ka apot.
U la iathuh ba kine ki 2 ngut kim tip eiei don aiu hapoh bad na ka jingioh sngew ba pyrta jingiarap mar mar ki la leit shapoh, kine ki 2ngut ki don ia ki khun ba dang rit u la iathuh.
Kine 5 ngut kiba iap ki kynthup 2 ngut ki nepali bad 3 ngut ki dei ki khasi. Na ka liang ki pulit haba la ioh jingtip ki la wan mar mar sha katei ka jaka hynrei kim shym lah shuh ban pyllait im ia ki bad la pynkit noh ia ki sha civil hospital ban leh ia ka post mortem.
U rangbah shnong u la kyntu ia ka sorkar ba shimkhia ia kane ka jingjia bad buh ia ki kyndon ba ki paidbah kin bud ryntih bad buh pud ia kine kiba shu tih hi da ka bor met da kaba ong ba ia ka jingtih pung na ka liang ka shnong ka khang beit.
