Shillong Naitung 11: Ka BH Accentuate Makeup, hair and Academy, ka la rakhe ia ka jingdap ar snem naduh ba la seng ia kane ka shlem ai jinghikai hynne ka sngi saitjain jong ka taiew, ha ryngkat ka jingpynkup burom ia ki khynnah samla kiba la pyndep ia ki jinghikai ha ka liang ka makeup, hair styling, bad ka jingpynbha briew.
Ha kane ka sngi ba kyrpang la don lang u bah Adelbert Nongrum u MLA ka North Shillong Constituency, u Rangbah Shnong ka Shnong Riatsamthiah, ki ba la hah khot sngewbha bad ki samla pule.
Haba ai jingkren kum u kongsan, u bah Adelbert Nongrum u la ai khublei kyrpang ia ka academy kaba la la rakhe ia kane ka lyngkhuh dap ar snem naduh ba la sdang ia ka, u la ai jingiaroh ia ka jing jop bad ia ka jingnoh synniang jong ka ban pyntbit ia ki samla ha ki sap ba ki don. U la ai khublei ia ki bor pyniaid kiba la thaw lad ia ki samla ban pyntbit ha ka kam ban pynbha briew.
Kaba baroh ki phai khmat bha.
U la ong ruh ba kum kine ki lad ki ai jingiarap ia ki samla kiba don sap, bad ban sdang ia la ki jong ki kam khlem ap ia ki kam sorkar. Kum u Nongmihkhmat u don la ka jong ka bynta ban peit ia ka jingeh kaba ki mat. Bad Kular ruh ba un dang iai kren ia ki mat kiba ktah ia ki samla ha Iingdorbar thawaiñ ka Jylla bad lada um ioh ka kular kaba biang yn leit ruh sha iingbishar ban tuklar lem na ka bynta ka jingmyntoi ki samla ka Jylla hi baroh ka wei.
U la ai jingiaroh ia u Bah Badap Hynñiewta uba wan phai biang sha la ka Jylla wad la u la biang ka kam ka jam ha Nongbah Delhi na ka bynta jong u bad ka iing ka sem, hynrei ka mynsiem ban hikai ia ki paradoh para snem kam ai lad ia u ban shu peit bad I’m tang ia lade, dei na kata ka daw u la wan phai bad sam lem ia ka jingstad kaba u la ioh sha ki samla jong ka jaidbynriew.
U bah Adelbert u la kot bok kit rwiang ia u bah Badap ba un dang lah ban trei shuh shuh ban btien lynti ia ki Samla ha la lynti kaba u trei bad ba kin lah ruh ban ai kam ai jam ia ki wei pat.
Na ka liang U Rangbah Shnong ka Riatsamthiah u bah M. Kharkrang haba ai jingkren ha kane ka sngi u la ban jur ia ka jingnang kiew ka jingdonkam jong ka jinghikai kaba pynshong nongrim ha ka jingpyntbit ha kane ka juk mynta. U la pynshlur ia ki samla ban pdiang ia ki jinghikai kam ban kyntiew ia ka lad kamai jong ki.
La pynkut ia kane ka prokram da ka jingai khublei bad ai ia ki syrnot sha ki samla pule kiba la pyndep hok ia ka jinghikai jong ki, kaba la pynlong sa kawei pat ka mawjam ha ka jingpyrshang jong ka academy ban kyntiew ia ka jingpyntbit bad ka jingseng kam seng jam ki samla.
