Mawkyrwat, Jylliew 09: Ka District Disaster Management Authority (DDMA), South West Khasi Hills District, Mawkyrwat, kala pynmih ïa ka jingkyntu paidbah halor ka jingma kaba lah ban mih na ka jingjur slap, ka lyer kaba jur, u phria, ka jingtwa khyndew bad ka lei-
lieh, da kaba kyntu ïa ki paidbah ba kin long kiba husiar bad shim ïa ki lad jingïada kiba donkam ban lait na kino kino ki jingjia ba sngewsih.
Ka District Administration ka kyntu ïa ki paidbah ba kin kiar na kaba leit shajan ki wah, ki wahduid bad ki kshaid ha ka por ba jur slap. Ym dei ruh ban pyrshang ban ïaid lyngba ki surok kiba la shlei um ne ki jaka ba tuid stet ka um namar ka bor jong ka um ka lah ban rongnoh ïa u
briew da kaba suk.
La kyntu ruh ïa ki nongleit nongwan ba kin long kiba phikir bha haba ïaid ha ki surok shnong, ki surokbah bad ki surok khaplum ha ka por ba jur slap, namar ka jingma na ka jingtwa khyndew bad ka jinghap maw ne kiwei kiwei ki jingjulor kiba lah ban jia khamtam ha ka por mynmiet.
Ki paidbah ki dei ban pynskhem bha ïa ki tiar sawdong iing kum ki tin tap iing, ki tiar rep, ki signboard bad kiwei kiwei ki tiar kiba lah ban shah rong noh ha ka lyer kaba jur. Ka Administration ka kyntu ruh ban khang bad pynskhem bha ïa ki jingkhang bad jingkhangïit khnang ban lait na ka jingjulor ha ka por ba jur ka lyer bad ka ‘er-iong.
Ha ka por ba jur u pyrthat bad u lei-lieh, la kyntu ïa ki paidbah ba kin sah hapoh iing ne ha ki jaka kiba shngain. Dei ban kiar na kaba ïeng hapoh ki dieng kiba jrong, hajan ki post elektrik ne ki lain bording namar kine ki jaka ki lah ban wanrah jingma.
La ai jingmut ruh ba dei ban pynlip noh ïa ki tiar elektrik kum ki telebision, mobile charger, isteri, radio bad kiwei kiwei ki tiar elektronik lada ka jingïoh pyrthat bad lei-lieh ka bteng slem.
Ki nongrep ki dei ban kiar na kaba trei ha ki lyngkha ne ha ki jaka lum ha ka por ba jur slap, ‘er-iong, pyrthat ne phria. Ki dei ruh ban pynthikna ba la buh ïa ki jingri ha ki jaka rieh kiba shngain.
Ha ka por ba jur ka phria, la kyntu ïa ki paidbah ba kin sah hapoh iing bad kiar na kino kino ki kam shabar. Kumjuh ruh, ki kmie ki kpa bad ki bor pynïaid skul ki dei ban pynthikna ba ki khynnah kin sah ha ki jaka kiba shngain bad kin ym leit ïalehkai shabar ha ka por ba don ka
jingma na ka suinbneng.
Lada jia ba don ka jingïap jong kino kino ki mrad, la kyrpad ïa ki nongshong shnong ba kin pyntip mardor sha ka tnad Veterinary jong ka Block ne District hapoh 24 kynta khnang ban lah ban shim ïa ki sienjam kiba donkam.
Ka Administration ka kyntu ïa ki paidbah ba kin bud ryntih ïa ki jingmaham bad jingbthah ba la pynmih da ka India Meteorological Department (IMD) bad da ki bor synshar district na ka por
sha ka por.
Ha kino kino ki jingjia ba kyrkieh ne jingïarap ba donkam ha ka por ba jia ki jingïamih na ki bor mariang, ki paidbah ki lah ban phone ha u Emergency Helpline Number 112 lane pyntip sha ka District Control Room bad ki Block Development Officer ba dei peit.
Ki Number Jingiarap Ba Kyrkieh:
•ADC & CEO, In-charge Revenue & Disaster Management Department – 9612498069.
• In-charge Block Development Officer, Mawkyrwat C&RD Block – 7005481195
•Block Development Officer, Ranikor C&RD Block – 9863112181
• District Disaster Management Officer – 7005602113
• District Control Room – 03656-259031 / 1077
• Emergency Helpline – 112
Ka District Administration ka kyrpad ïa baroh ki nongshong shnong ba kin long kiba husiar, kiba peitngor bad ban shim ïa ki lad jingïada baroh kiba donkam khnang ban lait na ki jingjia ba sngewsih ha kine ki sngi ba jur ka jingkylla ka suinbneng.
