BYM SIEW TULOP KI TNAT PHE,PWD ROAD BAD BUILDING MAT JINGEH KI NONGTREI MUSTER ROLL

Shillong Jylliew 09: Ka Joint Action Committee Muster roll Workers Union hynne ka sngi kala kyntu ia ki tnat sorkar ban siew noh ia ka tulop kaba ki dei ban ioh namar kine ki longiing ki la mat ia ki jingeh ha kine ki bnai kiba la dep
Haba ia kren bad ki nongthoh khubor u nongaibuid jong ka JAC u bah Khroo Lamsalanki Pariat u la ong ba ha kine ki sngi jong u bnai Jymmang ka la don ka jingtieng na ki nongtrei ka tnat PHE , PWD road, bad building na ka daw ba ki nongtrei Muster roll jong ka PHE naduh u bnai Lber, ïaiong , Jymmang kim shym la ioh tulop bad ka PWD Building naduh u bnai Lber, Ïaiong bad Jymmang kim pat ioh tulop kumjuh ruh kiba trei ha ka PWD Road . kane ka jingbym ioh jingsiew hadien ba ki la trei ruh kala ktah ia baroh ki nongtrei ha kine ki artylli ki tnat.
Ka JAC kaba la shimti ban ia kren halor kane ka mat, ka la wad jingtip halor kane na u Commissioner and secretary ka PWD road bad building bad ruh na u Commissioner and Secretary PHE ka daw ka long ba ka sorkar khamtam ka tnat pla pisa ka la sdang ban ai hukum ia ki Chief Engineer ia ka PWD, PHE bad baroh ki wei ki tnat ba dei ban pyntrei kam noh ia ka order kaba ka tnat pla Pisa ka la ai naduh u Naitung 2020, ka hukum ka ong ba dei ban siew man u bnai ia ki nongtrei Muster roll , dei ban siew hapoh ka 10 tarik bad kaba kongsan tam ka long ba khnang ba ka tnat pla pisa ka jylla kan buh lypa ia ka pisa ka dei ban tip katno ngut ki nongtrei Muster roll ki don, ka ophis ka dei ban ai ia ka kyrteng bad ka tarik ba ki joint bad katno ki la siew ia ki khang ba kin lah ban buh la kajong ia ka pisa ka jong ki.
U bah Khroo u la iathuh ba ka Tnat pla pisa kan buh lypa lai bnai ka pisa khnang ba ki nongtrei Muster roll kin ioh ia ka jingsiew man la u bnai, halor kane ka hukum ka JAC ka lap ba ka tnat PHE bad ka PWD Road bad building ki khlem pyntrei kam kat kum kane ka hukum na kata ka daw ka don kane ka jingsah kut noh bad kim siew ia ka pisa.
Ka JAC hadien ba ki tip ia kane ka jingshisha ki la ujor sha u Myntri Rangbah ka jylla u Conrad Sangma ha ka jingiakynduh bad u bad u la ong ba ka dei ka jingshisha bad na ka liang ka jong u Myntri Rangbah u ka kubur ba dei ban pyntrei kam ia kane ka jingbthah.
Shuh shuh u bah Khroo u la iathuh ba na ka liang ka JAC hadien bad ki la dep ban ai da ka jingthoh, ka seng ka kyrpad ia ki tnat ba ha kine ki bnai ba kim siew ia ka pisa bad kim shym la pyntrei kam ia ka order, ka JAC ka dawa ba ki dei ban siew noh mardor hapoh jong u ne u bnai Jylliew, namar ki nongtrei kiba trei ia kane ka kam ki mat jingeh ban pyndap pynbiang ia ka iing ka sem bad ia ki khun ki kti.