Thang ka South West Khasi Hills District Congress Committee ïa ka tyngshop u Gyanesh Kumar CEC ka Election Commission ka India

Mawkyrwat Nailur 28: Ka South West Khasi hills District Congress Committee hynne ka sngi ki la pynlong ia ka jingiaid paidbah ban dawa weng mardor ia u Chief Election Commissioner (CEC) ka Election Commission jong ka ri India u Gyanesh Kumar.
Haba kren bad ki nongthoh khubor u President ka South West Khasi hills District Congress Committee u bah Kynpham V Kharlyngdoh u la iathuh ba kane ka jingiaid paidbah ka dei ban pynrem ia ka jingtuh pylleiñ pylleiñ ia ki vote da ka Election Commission ban pynjop ia ka BJP. Ha ki ba bun ki jaka ha Maharashtra, Haryana, West Bengal, Assam la iohi ba lyngba ka ECI ka la iarap ia ka BJP ban jop. Kane ka SIR kaba la pynlong da ka BJP ka long pyrshah ia ka riti trei kam ka ri bad kalong ruh kaei kaei kaba long pyrshah ia ka mon jong u Paidbah.
U bah Kharlyngdoh u la ong ba kane ka jingleh ka BJP ka long ban noh tang sha ka BJP bad ia ka liangpyrshah ka la weng lut ia ka Vote khamtam kito ki ba kyrshan ia ka liang pyrshah kaba ia khun pyrshah ia ka BJP.
U la bynrap ba ka Seng ha baroh ka India ka la pynlong ia kane ka jingia iaid paidbah ban ia snoh kti lang bad ka ri India baroh ka wei. Ka jingleh jong ka BJP kala long palat. Ka congress ka dawa ba ka sorkar ka dei ban kem mardor ia u Gyanesh Kumar bad u dei ban iehnoh kam noh kum u Chief Election Commissioner ka ECI.
U la iathuh ruh ba ia kane ka SIR kaba la leh mynta la pyrshah da ki arngut ki Commissioner kata u Sukhbir Singh Sandhu bad u Vivek Joshi hynrei u Gyanesh Kumar u khlem sngap ia kata bad u la iaid sha khmat ia kane ka SIR bad khamtam ban weng noh ia ka vote jong ki nongkyrshan ka liang pyrshah, kane ka jingleh jong u ka long ban noh sha ka BJP bad ha ki ba bun ki jylla ba ka BJP ka jop ka dei na kane ka daw.
U bah Kharlyngdoh u la ong ruh ba lada ka Sorkar India kam weng ia u Gyanesh Kumar ka Congress kan pynjur ia ka jingiakhih nangne sha khmat haduh ba un da iehnoh kam. Ka Congress ka don lang bad ki paidbah kiba la shah weng ia ka Vote ka jong ki khlem kano kano ka daw bad ka nongrim kaba ki weng noh.
Ha kane ka jingiaid paidbah ki nongkyrshan ka Congress ki la thang ruh ia ka tynshop jong u Chief Election Commissioner (CEC) ka Election Commission jong ka ri India u Gyanesh Kumar.