Shillong Risaw 07: U MLA ka Mawryngkneng Constituency, u Bah Heavingstone Kharpran hynne ka sngi u la leit jurip ïa ka jaka ba la buh ïa ka temporary police checkpoint/shelter ha Diengpasoh ryngkat bad ka Executive Committee jong ka Dorbar Shnong Diengpasoh, hadien ka jingmih jong ki jingkhuslai halor ka rukom treikam jong ki pulit ha katei ka jaka.
Ha kane ka jingjurip, u MLA u la pynpaw ïa ka jingsngewkhia bad jingsngewbitar kaba jur halor kane ka jingjia bad u la maham tyngeh ïa u Officer-in-Charge ba thymmai, u Bah Bamon, ba kum kine ki jingjia kim dei shuh ban jia biang ha ki por ban wan. U la ban jur ba ka jingtreikam jong ki pulit ka dei ban long kaba shai, katkum ka aiñ bad kaba don ka jingkitkhlieh, khnang ba ki paidbah kin don jingshaniah ha ki pulit.
U MLA u la pynkynmaw ba la bunsien u la pynpaw ïa ka jingsngewkhia halor ka jingñiah kali sted bad khlemakor bad ki jingjia aksiden ha ka surokbah. U la kyntu ïa ki pulit ba kin pynleit jingmut bad pynjur ïa ka jingtalasi ïa ki kali kiba ñiah sted, ki trok kiba kit palat pud (overloading), ka jingkit ïa ki mar kiba be-aiñ bad kiwei ki jingpynkheiñ aiñ kiba buh jingma ïa ki paidbah.
U MLA u la pynshai ba ka jingtalasi ïa ki kali na ka bynta ka jingshngaiñ jong ki paidbah ka long kaba donkam, hynrei ka dei ban long katkum ka aiñ bad ki kyndon kiba la buh. Na ka liang u Officer-in-Charge ba thymmai, u la ai ka jingkular ha u MLA bad ki nongmihkhmat ka Dorbar Shnong ba kum kine ki jingjia kin ym dei shuh ban jia biang, bad ba yn pynneh ïa ka jingïatreilang bad jingïapyntip halor ki kam kiba ktah ïa ka jingshngaiñ jong ki paidbah.
Ka Dorbar Shnong Diengpasoh ka la pyntip ha u MLA ba ym shym la pyntip ne ïasyllok bad ka Dorbar shuwa ban buh ïa kine ki temporary police sheds/checkpoint. Ka Dorbar ka la maham ba nangne shakhmat, kano kano ka jingthmu ban buh ïa kum kine ki jaka ka dei ban don ka jingpyntip, jingïasyllok bad ka jingbit/NOC na ka Dorbar Shnong bad ki bor kiba dei peit.
Ïa kine ki jaka talasi ba ki la pynieng la dep pynpra bad weng noh, bad la ban jur ba kum kine ki jaka talasi ba shipor kim dei shuh ban mih khlem ka jingïasyllok bad ka jingbit kaba donkam na ka Dorbar Shnong bad ki local authorities.
U MLA u la ai ka jingkhublei ïa ka Executive Committee jong ka Dorbar Shnong Diengpasoh kaba la ïatreilang bad u ha kane ka joint inspection.
U la ai khublei ruh ïa ka Khasi Students’ Union (KSU) kaba la long kaba peitngor bad shimkhia ïa kane ka kam bad kaba la wanrah ïa kane ka mat sha ka jingtip jong ki paidbah. U MLA u la pynpaw ba ka jingpeitngor jong ki sengbhalang, Dorbar Shnong bad ki paidbah ka long kaba donkam ban pynneh ïa ka jingshai bad jingkitkhlieh.
U MLA u la ban jur ba un dang bteng ban buddien ïa ki mat kiba ïadei bad ka jingshngaiñ ha surokbah, jingñiah kali sted, ki aksiden, jingkit overload ki truck bad ka rukom treikam jong ki police department hapoh Mawryngkneng Constituency, khnang ban pynthikna ba ka jingtreikam jong ki pulit kan long katkum ka aiñ bad na ka bynta ka jingshngaiñ jong ki paidbah. La pynmih na ka bynta ka jingtip paidbah.
