Mawkyrwat, Naitung 22: Ka South West Khasi Hills District Congress Committee, hapoh ka jingïalam u Bah Kynpham V. Kharlyngdoh, President, ka la pynlong ïa ka jingïakynduhlang ha ophis treikam jong ka party ha Mawkyrwat ban pynpaw ïa ka jingsngewsih bad jingsngewkhia kaba jur halor ka jingïakhih jong ki samla pule ha Jantar Mantar, New Delhi.
Haba kren sha ki lad pathai khubor, u Bah Kynpham u la ong ba ka Congress ka pynrem jur ïa ka jinglehdonbor jong ki bor synshar ka Sorkar India ha kaba bun ngut ki samla pule kiba mih paidbah ban dawa ïa ka hok halor ka jinglait tuh jong ki jingïingkylli eksamin kum ka NEET, JEE, NET bad kiwei pat ki eksamin, ki la shah bom bad shah shoh watla ka jingïakhih jong ki ka long kaba jai jai.
U la ong ruh ba ka party ka pynrem jur ïa ka jingshah rah jubor u Rahul Gandhi lem bad katto katne ngut ki MP jong ka Congress, kiba dei ki nongïalam liang pyrshah ha Parliament, katba ki dang leit ban ai mynsiem bad pynpaw ïa ka jingïatylli bad ki samla pule kiba jingïakhih.
Ka South West Khasi Hills District Congress Committee ka ai ïa ka jingkyrshan kaba pura ïa ki samla pule kiba dawa ïa ka hok bad ka jingtohkit kaba khuid halor ka jinglait tuh jong ki jingkylli eksamin. Ha kajuh ka por, ka party ka dawa ïa u Myntri Rangbahduh ka Ri, u Narendra Modi, ba un shimkhia mardor halor kane ka kam bad ban pynthikna ba yn leh ïa ka jingtohkit kaba laitluid bad kaba hok.
Shuh shuh, ka party ka dawa ruh ba dei ban pynhiar shuki noh ïa u Dharmendra Pradhan, Myntri ba peit ïa ka Tnad Pule Puthi jong ka Ri India namar ka jingbym lah jong ka tnad ban ïada ïa ka jingïaid beit jong ki eksamin bad ban pynneh ïa ka jingshaniah jong ki samla pule bad ki paidbah.
Ha kane ka jingïalang la ïadonlang ruh u Bah Arful Syiemlieh, General Secretary ka South West Khasi Hills District Congress Committee, u Bah Manstudy Nongrem, Ex-MDC bad Ex-CEM ka KHADC; u Bah Denis Nongsiej, Vice President; bad ki dkhot na ka Mahila Mawkyrwat Block Congress, kiba la pynpaw lang ïa ka jingkyrshan ïa ki samla pule bad ïa ka nongrim jong ka party halor kane ka mat kaba ktah ïa ka lawei jong ki samla pule ha ka Ri India.
