Shillong Naitung 22: Ka National People’s Party Farmers’ Front Meghalaya State Unit ha ka sngi Balang ka la pynlong ia ka jingiakren hapdeng ki nongrep bad ki nongkhaii jhur halor ka jinghiar dor shaba palat jong ki marrep khamtam u kubi bad u muli.
Haba kren sha ki lad pathai khubor u general secretary u Bah Egenstar Kurkalang u la ong ba ki nongkhaii na Iewduh bad kiwei pat ki iew ki la pyntip ba ka jingdawa jhur na Meghalaya ka la nang hiar ha ki iew ba kongsan kum ha Siliguri bad ha Upper Assam, ha kaba ki nongthied mynta ki kham jied bha ia ki jhur na Arunachal Pradesh bad na Nagaland namar ki kham duna dor.
U la ong ruh ba ki iew ha Lower Assam pat ki shanniah da ki jhur ba la thung hi ki trai shnong kaba la hiar ka jingthied jhur na Meghalaya.
U la ong ba kane ka mat kam dei kaba dang jia ha Meghalaya bad u la khot ia ka jingiatreilang hapdeng ki nongrep, ki nongkhaii bad ka sorkar ban pyntikna ban buh ia ka dor kaba biang bad ban pyllait na ka jingduhnong ki nongrep.
