Nongpoh, Jylliew 4: U Myntri ka Sorkar Pdeng ba dei khmih iaka Health and Family Welfare bad Chemical and Fertilizers, u JP Nadda mynta ka sngi u la wan iuh kjat ha Ri Bhoi ban plie paidbah iaka ARHI Hospital ha Jorabat. Kane ka jaka ai jingsumar kaba heh bad kaba la bit la biang nadong shadong ban ai iaka jingsumar kaba paka sha ki paidbah ka jylla bad ka thain shatei lam mih hi baroh kawei.
Ha kane ka sngi plie paidbah ia ka ARHI Hospital kaba la pyniaid da ka Far East Welness Pvt. Ltd, la wan ban iadon ryngkat ruh da u Bah Wailadmiki Shylla, Health Ministerka jylla, u Bah Sosthenes Sohtun Minister ka tnad C&RD ka jylla, u Bah AL Hek, Chairman jongka ARHI Hospital nalor kiwei kiwei de ki heh sorkar, ki doktor, ki nongialam shnong bad nongshah khot sngewbha.
Haba ai jingkren ha kane ka sngi, u JP Nadda u la ong ba hapoh ka jingialam jong u Myntri Rangbah duh ka ri, u Narendra Modi, ka thain shatei lam mihngi kala iohi iaka jingnang kiew steddl ha ki ba bun ki loang, khamtam ha kaba iadei bad ka koit ka khiah, kiba la btin lynti lyngba ki sienjam kum ka Act East Policy bad ka jingphai khmat ba kyrpang ka sorkar sha kane ka thain.
U la ai ruh ka jingiaroh sha ki bor pyniaid ka ARHI Hospital kiba la pynbit pynbiang da ki tiar bad ki kor ki bor kiba katkum kane ka juk stad kaba mynta ha kane ka jaka ai jingsumar kum ka Oncology Unit, ka PET-CT Scan, Critical Care Services, Neonatal Intensive Care Unit, ka Advanced Diangnostic Services, Modular Operation Theaters nalor kiwei kiwei de.
