Ranikor, Nailar 28, 2026: Ka FKJGP Ranikor Circle mynta ka sngi, 28 tarik u Nailar, 2026, ka la pynlong ïa ka jingïalang kyrkieh hadien ka jingwan ud wan nam jong ki nongrep na ki bynta bapher bapher hapoh ka thaiñ Ranikor halor ka jingpynjulor jong ki hati khlaw ïa ki mar rep jong ki.
Katkum ka jingïathuh jong ka seng, ka jingpynjulor jong ki hati khlaw ïa ki mar rep ka la jia naduh ki snem kiba la dep, bad wat ha kine ki khyndiat bnai kiba la dep ruh don bun ngut ki nongrep kiba dang shah ktah jur. Watla katta, haduh mynta ki nongrep kim pat ïoh kano kano ka jingiarap na ka Sorkar.
Namarkata, ka FKJGP jong ka Ranikor Circle, lyngba kane ka jingïalang, hapoh ka jingïalam jong u Bah Balse Kharbani kum u President, FKJGP Ranikor Circle ka kyntu jur ïa ka Sorkar ba ka dei ban shimkhia ïa kane ka mat bad ban ai jingiarap noh mardor ïa ki nongrep kiba la shah pynjulor ïa ki mar rep jong ki, kynthup ïa ki dieng kwai, phan dieng, shriew, sohtrun bad kiwei kiwei.
