Pynjlan ka sorkar ïa ka jingsiew ia ki Khajna jong ki Trok haduh 31 Tarik u Risaw 2026, Ai khublei ka AMTODWA ïa ka tnat Transport

Shillong Nailar 28: Ka sorkar Meghalaya ka la pynbna ba ka la pynjlan ia ka One time Settlement Scheme ban siew ia khajna haba ia dei bad ka Motor Vehicle Tax, Passenger bad Goods Tax bad ka jingsiew ia ka Fitness haduh ka 31 tarik u Risaw 2026.
Haba ia kren bad ki nongthoh khubor u bah Wanshuwa Nongtdu President ka All Meghalaya Truck owner, Driver and welfare Associatiuon u la iathuh ba ha ka 21 tarik u Nailar ka seng ka la wan ban buh da ka jingthoh sha u Commissioner and Secretary ka tnat Transport u Sanjay Goyal IAS ban kyntu ia ka tnat ban pynjlan ia ka jingsiew ia ki khajan jong ki trok, da kaba shim kabu ruh ia ka skhim kaba la wan rah da ka sorkar jylla ka One Time Settlement Scheme.
Na ka liang u bah Nongtdu u la ai khublei ia u Commissioner and secretary ka tnat Transport u Sanjay Goyal bad ka kynhun jong ka tnat kiba la sngap ia ka jingkyrpad jong ki nongbuh trok bad ki nongniah trok ha kaba ka tnat ka la pynbna ba la pynjlan ia ka haduh ka 31 tarik u Risaw 2026 .
U la ong ba ka seng ka la kyrpad haduh u Nohprah hynrei ka don ka jingiakren hapdeng ka kynhun bad ka sorkar, na kata ka daw ka sorkar ka buh noh haduh ka 31 tarik u Risaw, kane ka long ka jingmyntoi shibun ia ki nongbuh Trok namar ki don ki bym pat ioh lad ban siew.
U la bynrap ruh da kaba ong ba ka jingiaid lynti jong ka seng ka la mat ia ki jingshah kynnoh bad ki jingshah kynthoh hynrei ngim don eiei ia kata namar ki trei na ka bynta ka jingmyntoi jong ki paidbah. U la kyntu ia ki nongbuh trok ban shim ia kane ka kabu kaba ka sorkar ka la ai ia ki namar ioh ka sorkar hadien kan ym ai lad shuh.
U la kyntu ia baroh ban siew noh ia ki khajna khnag ba kan ym don shuh kano kano ka jingshah pynthud ha ki lynti ki syngkien.