Ka jingsahdien ka pynlong ia ka Elaka Nongkhlieh ban pdiang ia ka Shree Cement Ltd

Shillong Nailar 19: Ki nongialam jong ka Elaka Nongkhlieh East Jaintia Hills District hynne ka sngi ki la pynpaw ba ka Elaka ka pdiang ia ka karkhana Shree Cement Ltd ka dei ba ka roi ka npar, ka ioh kam ioh jam kin wan ha ka Elaka hi baroh ka wei .
Haba kren bad ki nongthoh khubor ha Shillong Press Clun u Secretary ka Elaka Nongkhlieh u bah F Bareh u la ong ba kum ki rangbah ki ba peit ia ka roi ka par, ka jingshah dien jong ki paidbah ki pdiang ia ka Shree Cement ban wan rah ia ka roi ka par, na kata ka daw ki pdiang bad ki don ka jingkyrmen ba da ka jingwan jong ka kan wan rah ia ka jingstad ka jingnang, bad naduh ba sdang ki la ia pynbeit bad kane ka karkhana naduh ka ioh kam ka ioh jam, ka lynti ka syngkien haduh ka jingsiew ba ka dei ban siew sha ka Elaka. Ngi la ialeh ia kane da ka jingiapynbiet lang ha khmat ka dorbar.
U la kyrpad ia ki paradoh para snem ban kyrshan lem, khang ba ka shnong kan kiew bad ki paid nongshong shnong kin ioh ka lad ban phah ia ki khun sha ki skul ki ba biang.
Na ka liag u Dalloi ka Elaka Nongkhlieh u Ma N Sukhlain haba kren bad ki nongthoh khubor u la ong ba ki wan hangne ban pynithuh sha ki khun ka jylla baroh ka wei, namar kum ka Elaka naduh ba sdang ban pdiang ia ka Shree Cement Ltd ki la ia mynjur lang. U Dalloi u la kyrpad ruh ia ki seng bad ki nongialam ka jylla ban iarap ia ka Elaka ban iarap namar kum ki nongshong shnong ki ia kynduh bun ki jingeh lada ia nujor bad ki bynta jong ka jylla.
U la ong ruh ba ki don ki jingiakut bad kane ka karkhana kum ka skul ha kaba ka Elaka ka la iakren ba ka Kompani kan ai ka wei ka skul naduh Nursery shaduh class 12 ba ki khun ki kti jong ki kin ioh ban pyndep ia ka jingpule, ngi kwah ban roi ban par kum ki khun ka jylla Meghalaya.
Haba ia dei bad ka jingmih ki nongpyrshah na ka liang u Secretary u la ong ba kin don kaei kaei ban kynthoh ia ki namar ki don la ka jong ka jingsngewthuh ka jong ki, u la ong ruh ba lada ki tip ia ka daw ba ki pyrshah na ka liang ka Elaka kan jin da la ia kynduh ban sngap ia ka daw balei ba ki pyrshah hynrei namar kim tip eiei ka eh ia ki ban kren eiei.
Haba ia dei bad ka jingkynnoh ba ki ba pyrshah ki tieh ia ka surok, na ka liang U Secretary ka Elaka u la kyntait war ia kane bad ong ba ka Elaka kam tip eiei halor kane bad pynrem ruh ia kito kiba leh ia kane ka kam, kaba pynjah burom ia ka Elaka hi baroh ka wei. Shuh shuh haba ia dei bad ka jingkynnoh ba kiba wan ban ia shim bynta ki don tang khyndiat ha ka Public hearing na ka liangu bah Bareh u la ong ba ka jaka kaba pynlong ia ka jingialang ka kham jngai bad tang kiba don kali ki lah ban poi, hynrei na ka liang ka Elaka ka la dep pynbna ba baroh kidei ban wan ban ia shim bynta la ka dei na ka liang kiba kyrshan ne kiba pyrshah.