Shillong Naitung 14: Ka bor synshar district jong ka East Khasi Hills ka la pynjur ïa ka Special Intensive Revision (SIR) 2026 jong ka thup kyrteng ki nongthep vote, ha kaba la buh ïa ka 18 tarik naitung kum ka tarik ba la buh thong ban sam bad lum ïa ki Enumeration Form.
U District Election Officer (DEO) u ba dei ruh u Deputy Commissioner ka East Khasi Hills u Abhilash Baranwal, IAS u la hiar da lade ban peit bniah ïa ka jingïaid shakhmat jong ka jingpynrung kyrteng na ki wei ka ïing sha ka wei pat ka iing da kaba leit synsan lang bad peit ïa ka jingtreikam jong ki Booth Level Officer (BLO) bad ki BLO Supervisor ha kylleng ki Constituency ka district
Haba kren sha ki lad pathai khubor, u Abhilash Baranwal u la kyrpad ïa baroh ki nongthep vote kiba la pynrung kyrteng ba kin leit sha la ki jong ki jaka thep vote ha ka 18 tarik u naitung, khlem da kheiñ la ki dei kiba sah mynta ha katei ka thaiñ, ban shim ïa ki Enumeration Form jong ki lane ban aiti ïa ki phorm ba la pyndap bha sha ki BLO. U la ong ba la bthah ia baroh ki BLO ba kin sah ha ki jaka thep vote baroh shisngi ban iarap ia ki nongthep vote.
U Baranwal u la ong ba ka jingleit jurip ka long ruh ban sngewthuh ia ki jingeh ba ki BLO ki iakynduh ha ka por ba ki leit sha ki iing ki sem bad ban bishar bniah kumno ki pynbeit ia ki jingeh bad ki jingsngewthuh bakla jong ki paidbah kiba don sawdong jong ka jingpyntreikam ia ka SIR katba ki dang tei ia ka jingshaniah ha ki nongthep vote.
Haba pynpaw ïa ka jingkmen halor ka jingkiew haduh mynta, u la ong ba ki BLO ki long kiba la pyntbit bha bad kiba trei hok ïa ki kamram jong ki. U la pynpaw ka jingsngewskhem ba ka bor synshar district kan pyndep ïa baroh ar ka jingsam bad ka jingpynlong digital ïa baroh ki Enumeration Form hapoh ka por ba la buh.
