Songsak, Nailar 30: Ka Meghalaya Police ka la iakhun pyrshah ïa ki kynhun nongleh kam sniew kiba treikam hapdeng ka Meghalaya bad Assam, Ha ka jingïather kuli ba mar Kylliang kaba jia dang step phyrngab jong ka 30 tarik u Nailar, saw ngut ki briew kiba suba ba ki dei ki nongleh kam sniew ki la iap.
Ka jingïasiat ka la jia ha ka por kumba 4 baje mynstep, hajan ka Songsak Police Station, ha ka surok Songsak–Mendipathar.
Hadien ba ki pulit ki la ioh ïa ki jingtip kiba tikna na ka tnat syntiat kiba la ong ba kawei ka kynhun nongleh kam sniew ka dang wan sha ka shnong Songsak da ki jingthmu ban lute.
U Superintendent of Police (SP) jong ka East Garo Hills district, u Swapnil Pawar, u la ong, “Ngi la ioh ïa ki jingtip kiba bniah na ki tyllong khubor jong ngi, bad da kaba pynshong nongrim halor kine ki jingtip, ki kynhun pulit na EGH district police bad ka ATF ki la pahara ha ka surok Mendi–Songsak. Ha ka por kumba 4 baje mynstep, la khang lynti ïa kawei ka kali bad la pyni dak ïa ki briew kiba don hapoh ka kali ban sangeh. Hynrei, kane ka kynhun haba ki iohi ïa ki pulit, ki la siat sha ki pulit kaba pynlong ïa ki ban pynphai. Baroh saw ngut kiba don hapoh ka kali ki la mynsaw jur ha ka jingïasiat, katba kawei ka kali pulit ruh ka la shah pynjulor.
Ki pulit ki la pyni ïa ki bynta jong ki kuli kiba la dep siat, kiba wan na baroh arliang—na ki briew ba la suba nongleh kam sniew bad na ki pulit. Ka kali jong ki briew ba la suba ruh ka la don bun tylli ki thliew kuli.
Ha kawei ka pla kaba la plie ha khmat ki sakhi, ba la lap na ka kali jong ki briew ba la suba, la shem palat san tylli ki kuli kiba dang im na ka suloi automatic. La shem ruh kawei ka mobile phone ha ka jaka jong ka jingjia, katba kawei pat ka la julor ha ka jingïasiat. Ar tylli ki phone kiba dang sah ki la suba ba ki don bad ki briew kiba mynsaw haba la kit noh ïa ki na ka jaka jong ka jingjia sha jaka sumar.
U SP u la pyntip ba hadien ka jingïasiat, la kit mar mar ïa ki briew kiba mynsaw sha Songsak PHC, na kaba la phah noh ïa ki sha Williamnagar Civil Hospital. Hynrei, ki doktor ki la pynbna ba baroh saw ngut ki la khlad lypa haba poi ha hospital.
Na ka jaka ba jia ka jingjia, la ioh kurup ïa kumba ar tylli ki pistol automatic na hapoh ka kali, ha ka por ba ka FSL ka dang pynlong ïa ka jingtohkit bad bishar bniah ïa ka jaka jong ka jingjia. Hadien kata, la phah ïa u Magistrate ban pynlong ïa ka jingtohkit kaba nyngkong, katba ka post-mortem yn leh ha Williamnagar Civil Hospital.
Katkum ki jingtip kiba nyngkong, lai ngut na kiba khlad ki dei na Assam, katba uwei pat u dei na Mendima, North Garo Hills (NGH). Watla la suba ba lah ban don kiwei pat ki dkhot jong kane ka kynhun, hynrei ha ka por ba jia ka jingïasiat, tang saw ngut kiba don hapoh ka kali. Ka kali la ithuh kum ka Mahindra Bolero kaba don ïa ki registration plate jong Assam.
Ki jingtip kiba la ioh kiba khlad ha ka jingïasiat ki dei u Sustom Rabha (Kaltu), u Kalam Sheikh na Agia, u Bobidul Islam na Krishnai bad u Alason Momin na Mendima. U Sustom u la don bun tylli ki mukotduma pyrshah ïa u, kynthup ïa ka jingtuh suloi, kam lute bad kiwei pat ki kam sniew.
Ka jaka ha kaba la jia kane ka jingïasiat ka dei kawei na ki lynti kiba ym ju pyndonkam ha Garo Hills. Hynrei mynta ka la long kawei na ki jaka ba don ka jingïaid ka kam namar kawei ka kompany kaba trei ïa ka surok ka la seng ïa ki camp jong ka hajan ka Reserve, na ka bynta ka jingiar bad pyn thymmai ïa ka surok Darugre–Rongrenggre.
