Shillong Jylliew 13: Ka Hynñiewtrep Youths’ Council Diengiei Circle hapoh ka jingialam jong u Vice-President, u Samla Sondalsik Lyngkhoi ha ka 12/06/2026 ka la leit ban jurip ïa ka jing pyntrei ïa ka surok Mawlaingut sha Lawmei kaba la mang Rs. 2,60,00,000/ (Ar klur hynriew phew lak). Ka jingleit jurip jong ka Seng ka long hadien ka jing ujor jong kiba bun halor ka jing pyntrei ia kane ka surok ka bym la long kat kum kaei kaba la mang da ka sorkar.
Ka Seng ka la lap ba ia ki nala bad ia ki kynroh ym shym la shna kat kum ka Estimate. Kat kum ka jingtip ba la lap lyngba ka RTI, la mang ban pyntrei 6 tylli ki kynroh kaba la mang haduh Rs. 26.96 lak hynrei ka seng ka lap ba ïa ka kynroh la pyntrei tang kawei.
Ka Seng ha ka RTI ka lap ruh ba la mang ban pyntrei ruh ïaka nala ha shi lynter jong ka surok kaba jrong 5Km, hynrei ka seng ka la lap ba ym shym la trei satia ïa kane ka nala ruh.
Shuh shuh, kat kum ka jingtip ba la ioh lyngba ka RTI ka seng ka la lap ba la mang na ka bynta ban tih khyndew ha ka dor Rs. 10.27 lak. Hynrei haba jurip kam shym la don kano kano ka dak tih khyndew.
Halor kane, na ka liang ka HYC Diengiei Circle ka dawa na ka PWD Mawphlang Division ban pyntrei ia ka tei ka surok kat kum ka Estimate ba la mang bad pan jingpynshai shuh halor ka jing bym pyntrei kat kum ka Estimate ba la buh. Lada ka PWD Mawphlang Division kam shym la pyntrei kumba la mang, ka paw shai ba ka don eiei sha lyndet bad halor kane, na ka liang jong ka Seng kan sa ïai bteng ban bud dien.
