Shillong Nailur 19: U Myntri Khynnah ka External Affairs and Textiles ka sorkar pdeng u Pabitra Margherita u la ong ba ka jylla Meghalaya kadei kawei na ki jaka kaba itynnad tam ha ka pyrthei bad kadei kaba la thaw Kyrpang da u Blei.
Kaei kaba ngim don ha Meghalaya, ki jingthung jingtep, ki mrad ki mreng, ki lum ki wah, ka jingitynnad, ka jingjyrngam, ki briew jong ka, ki riti dustur, ka kolshor, ki jain, ngi don bun bah kiei kiei ban khring sha ki briew ha ka pyrthei baroh kawei u la ong.
U la ong ba ki nongjngohkai na kylleng ka pyrthei ki ioh bun jait kiei kiei ba kin tip bad iohi ha kane ka jylla.
Kumta u la ong ba ka sorkar India ka ju kyrshan ia ki briew jong ka ha ka liang ka roi ka par, bun ki sienjam ka sorkar India ka la leh na ka bynta ban nang kyntiew ia ka kam jngohkai ha Meghalya bad ha ka thain shatei lammihngi.
Kumta u la pynpaw ka jingkyrmen skhem ba ki nongjngohkai na kylleng ka pyrthei kin nang wan bun ban wan jngoh ia ka Meghalaya ha ki snem ban sa wan.
