BUDDIEN KA KSU ÏA KI MAT JINGDAWA NA KA SORKAR,YN HIAR JURIP LANG ÏA KA ENTRY POINT HA UMLING

Shillong Nailur 8: Ki nongialam jong ka KSU hynne ka sngi ki la ia kynduh ia u Chief Secretary ka jylla U Dr. Shakil P. Ahammed, IAS ban ia kren halor ki mar jingdawa jong ka seng khamtam haba ia dei bad ka jingdawa kem ia kito ki briew ki ba don kti ban tih ia ka surok bad kawang maw ia kito ki ba thmu ban leit ban ia shim bynta ha ka Public hearing.
Haba kren bad ki nongthoh khubor hadein ka jingiakynduh na ka liang u Assistance Secretary u samla Pynshai Rani u la ong ba ka jingwan jong ki ka long ban wan buddien ia kaei kaba ki la ia kren ha ka 26 tarik u bnai ba la dep bad u Myntri rangbah. Mynta ka sngi ki la wan ban buddien ia kaei kaba ka sorkar ka la leh haduh kine ki sngi ki ba mynta.
U la ong ba ka seng ka la ia kren halor ka Public hearing ha kaba ka sorkar ka la thaw ia ka Fact finding committee kaei kaba ki ioh jingtip ka long ba ka sorkar ka la iaid sha khmat ia kane ka kam bad ka sorkar ka kular ba u DC , SP ka East Jaintia hills district bad u Member ka Meghalaya State Pollution Control Board kin ym don bynta ha kane ka komiti khang ba kan iaid beit iaid ryntih.
Haba ia dei bad ka MRSSA ka seng na ka por sha ka por ka ju buddien ka sorkar ka la iathuh ba lashai ka sngi kan don ka jingialang haba ia dei bad ka Entry bad exit point ha Umling, bad kan don ka jingia jurip lang. ka seng ka la ong ruh ba hadien ba ki la dep ia kane ka jaka ka seng kan sa wan ban buddien biang sa ia ka Entry bad exit point kaba don ha Rattachera.
Haba ia dei bad ka thung kam thung jam ka seng ka la ju ban ia ka sorkar ban pynduh noh ia ka Personal interview bad mynta ka sngi na ka liang ka sorkar ka la ai ia ka Notification ba la pynbna ba kan ym don ruh ia ka personal interview na ka bynta ki group D haba ia dei bad ka group C bad B ka sorkar ka dang peit bniah.