Shillong Risaw 07: Ka Mawlai Sports Club ka la rah ia ka nam lahduh ha ka Shillong Premier League 2026, hadien ba ka la pynliem noh ia ka Rangdajied United Football Club da 5 kol la nod ha ka jingiakhun kaba khatduh, kaba la long ha ka 7 tarik u Risaw 2026 ha SSA Stadium, Polo.
Kane ka nam jop ka la wan urlong lyngba ki kol ba la thep da u Basuklang Bina, Arkini Laloo , Fairming Suting, kumjuh u kapten u Damanbhalang Chyne bad u Ricky Chyne na ka bynta ban bat ia ka kyrdan ba hakhlieh da kaba kamai 21 poiñ ha ki khyndai sien iakhun jong kane ka lympung. Te kumta kane ka nam jop ka la pynlong ia ka Mawlai ba kan tam haduh 4 poin ia ka Shillong Lajong FC, kaba la wan ha ka kyrdan ba-ar bad da 5 poin ia ka Nongkseh bad ka Langsning, kiba la wan ha ki kyrdan balai bad basaw.
Kane ka long ka sien kaba lai ba ka Mawlai ka la ioh ban rah ia ka nam lahduh ha ka Shillong Premier League naduh ba ka la rah teng ia ka trophy nam lahduh ha u snem 2022 bad 2023.
Watla ha kaba sdang kane ka aiom, ka Mawlai ka la iakynduh jingeh namar ka jingmih noh kiba bun ki rangialehkai kiba la leit pyniasoh sha kiwei pat ki klob. Hynrei ka Mawlai ka la pynrung da kiba thymmai bad lyngba ka jingtrei shitom jong ki ha ryngkat ka jingkohnguh sneng ha u coach u Bah Hering Shangpliang, ka la pynlong ia kane ka klob ba kan kheit ia u soh uba thiang ha ka jingiaid lynti jong ka da kaba ka la long ka kynhun kaba khlem shah rem naduh kaba sdang jong kane ka lympung.
Mynta ka Mawlai kan pdiang ia ka trophy nam lahduh ha kaba kut jong kane ka lumpung ka ban long ha ka 10 tarik u Risaw 2026.
Ka Mawlai kan pynkhreh ruh sa kiwei pat ki lympung ialehkai nangne shakhmat kum ka Super Cup, Champions Cup ki ban long mynta u snem bad kumjuh ia ka Meghalaya State League ka ban long ha u snem ban wan.
