Paw ki dak ba lah ban tih marpoh khyndew ki paidbah na ka Jylla ha ka jaka kaba khamrit, yn buddien ka sorkar Jylla ban urlong noh kloi: Conrad

Shillong Risaw 14: U Myntri Rangbah ka jylla u Conrad K. Sangma u la pynpaw ba ka sorkar Meghalaya ha ka jingiatreilang bad ka sorkar pdeng ka la thaw ki lad ki lynti ban weng noh ia ka jingeh ba ki paidbah ki ia kynduh haba ia dei bad ka jingshah khang ban tih ia ki marpoh khyndew.
U la iathuh ba ka sorkar jylla ka la pyrshang ban thaw ki lad ki lynti ba rukom tih marpoh kyndew kan iahap bad ka jylla ka jong ngi kham tam haba ia dei bad ka long ka man jong ka mariang, bad ban ailad ba ka rukom tih kan dei ha ka jaka kaba rit bad kan dei kat kum ki jingbtah jong kane ka juk ba mynta ban peit ruh ia ka jingshngain jong ki nongtih bad ruh jongh ka mariang.U Conrad u la pynpaw ia kane haba kren ha ka jingrakhe ia ka jingdap 10 snem jong ka District Mineral Foundation (DMF),.
U Myntri rangbah u la iathuh ba ka jingiakren jong u bad ka sorkar pdeng ha kine ki bnai ba la dep , ha ryngkat ka jingpynshai sha baroh kiba don bynta mynta ka la sdang paw ki dak ki shin, kine baroh ki la leh namar ka jingeh kaba ki nongtih marpoh khyndew na ka jylla ki mat shibun ki jingeh na ka daw jong ki ain kiba ka sorkar ka wanrah.
U la bynrap ruh da kaba kyntuh iabaroh kiba tih marpoh khyndew la ka dei ia u Dewiong, u Maw ne u shyiap ban iai shah shipor namar ban weng ia kine ki jingkhang lad kam dei kaba tang shi miet ngi la lah, baroh ka don ka lynti kaba ki hap ban bud ban ioh ia uta u soh uba thiang.
U la ong ruh ba ka jylla Meghalaya ka pher lada ia nujor bad ki wei ki jylla kham tam haba ia dei u dewiong bad ka jinglong ka mariang, ka jylla ka iapher na ki wei ki jylla ha ka ri. Hynrei lada phai pat sha ka ain ba ka sorkar pdeng ka la wanrah ka jylla jong ngi ruh ka hap lang na kata ka daw ka buh jingeh shibun bad pynlong ia ka sorkar jylla ban pynsngewthuh ia ka sorkar pdeng ba ki ain ba ki wan rah kim lah ban trei kam ha ka jylla Meghalaya.
Shuh shuh u la ong ruh ba ka jingiaid lynti jong ki ha kine ki snem bad ki por ba la leit mynta ka paw ba ka lah ban urlong, bad ka sorkar pdeng ka lah ban ailad bad shah ha ka jaka kaba rit ryngkat bad ka jingbut ryntih ia ki kyndon kiba ka sorkar ka buh.