Shillong Nailur 17: Ka Meghalaya State Commission for Women, ha ka jingai jingkyrshan jong ka National Commission for Women, hynne ka sngi ka la pynlong ia ka State Consultation halor ka phang Maternity Benefit Act, 1961, bad ka Meghalaya Maternity Benefit Rules, 1965, ha kaba ki la iakren halor ka jingai shithi ia ki longkmie kiba ioh khun rit bad ka jingdonkam ban pynkhlain ban pyntrei kam ia ka.
Haba kren ha kane ka sngi na ka liang u Commissioner ka tnat Labour u bah Banteilang Kharshandi, MCS, u la ban jur ia ka jingdonkam ban pynsngewthuh halor ki ain bad ki kyndon jong ka jingai shuti ia ki longkmie, ki jingmyntoi bad ki bor kiba dei ban pan jingiarap lada ki mat kano kano ka jingeh.
Na ka liang u bah Kharshandi u la ong ba kane ka jingiakren ka dei ban pynkhlain ia ka jingtip , ban pule bad ruh ban pyntip banb peit ba ki jingmyntoi na ka bynta ki longkmei ka dei ban poi sha kito ki ba dei hok ban ioh ha ka por kaba biang.
U bah Kharshandi u la ong ba ka Maternity Benefit Act, kaba la mynjur ha u snem 1961, ka kynthup lang ia bun ki bynta kiba ia dei bad ka jing armet, kha khun bad kynthup lang ruh hadien bala dep kha bad ka jingioh bor jong ka kmie hadien ba la dep kha. Ka sorkar Meghalaya ka la thaw ia ki kyndon halor ka Meghalaya Maternity Benefit Rules ,1965,bad ki jingpynkylla halor kane ka ain ki la wan rah biang ha u snem 2017.
Shuh shuh u la batai ruh haba ia dei bad ki jingmyntoi ia ki longkmei ki ba mat ia ka jingshitom bad duh noh ia I khyllung , ne ka jingshah sumar ha ka por ba armet, ha kaba kine ki longkmie ki dei ban ioh ia ka shuti ban sumar shuwa ia lade.
Na ka liang u Commissioner ka tnat Labour u la ong ba kane ka ain ka long ban iada ia ki longkmie kiba armet na ki kam kiba don jingma, ban peit ba kin ioh ia ka jingsiew ha ka por ba ki shim shuti bad ban iada ba kim dei ban shah beh kam na ka daw ba kim wantrei ba ki shim shuti.
U bah Kharshandi u la ong ba kane ka ain ka donkam ia ka longkmie ban trei ha ka kam la kumno kumno 80 sngi ban ioh ia kine ki jingmyntoi. U la bynrap ruh da kaba ong ba ha Meghalaya ka la pynduna shuh shuh ia kane ka ain ha kaba lada don 10 ne tam ki nongtrei la pynhap ia kane hapoh jong ka jingioh jingmyntoi.
U la batai shuh shuh ba ka longkmei ka ioh shuthi 26 taiew na ka bynta I khun iba nyngkong bad ba ar, bad phra taiew shuwa ban kha. Shuh shuh lada ka Longkmie ka kha palat ia ar ngut ki khun ka ioh ia ka shuti kaba 12 taiew.
Kane ka ain ka ailad ruh ia ki longkmie kiba shuh tingkhun, khamtam lada I khyllung I dei iba hapoh ia ka lai bnai, haba ki ioh ia ka shuti kaba 12 taiew.
Shuh shuh u la iathuh ba ka sorkar Meghalaya ka la pynkhreh ia ka draft jong ki kyndon kiba dei hgapoh jong ka labour code bna thymmai bad myntya ki dang phah peit ha ka tnat ain .
U la ong ba ka tnat mynta ka la pynkhreh ia kane ki kyndon bad shen kin sa phah sha ka tnat kaba dei peit ban ioh ia ka jingmynjur, hadien kata pat kin sa phah sha ka Kynhun myntri ban ioh ia ka jingmynjur bad ban pynbna ia ka.
