Shillong Nailur 08: Ka jylla Assam bad ka meghalaya ki la ia mynjur ban iatreilang na ka bynta ban ia pynbeit ia ki mat kiba ktah ia ki nongniah kali tourist jong kine ki ar tylli ki jylla bad ban pyntikna ban pyniaid beit iaid ryntih ia ki kali.
Ia kane ka rai la shim ha ka high level committee ha Shillong mynta ka sngi ba ar kaba la pyniaid da u symbud myntri rangbah ka jylla u Bah Sniawbhalang Dhar bad u myntri ka Assam u Atul Bora bbad la don lang ruh ki ophisar jong baroh ar tylli ki sokar bad kiba nongmihkhmat na ki tourist taxi Association na Assam bad Meghalaya.
Ka jingiakren bahakhmat ka long halor ka jaka sangeh kali ha kad liengsuin bad kiwei ki jaka, ka bai pynieng kali ha Kamakhya Railway Station, ka jingtalasi ki pulit bad ka jingkynnoh ba don ki dalal ba pyniaid ia ki taxi tourist hapdeng ki jylla.
Haba kren sha ki lad pathai khubor hadien ka jingialang u Bah Dhar u la ong ba ka jingiakren ka long kaba seisoh bad baroh 2 tylli ki association ki la iamynjur ban iatreilang ban pynbeit ia kane ka jingeh.
U la ong ba ka Meghalaya association ka kwah ban ai jaka pynieng kali ia ki ha kad liengsuin ha Assam katba ka Association na Assam ka kwah ban jaka pynieng kali bad jaka leit shabar ha ki katto katne ki jaka ha Meghalaya. Baroh ar ki sorkar ki la mynjur ban pynbeit ia kane.
Ki arliang mamla ki la mynjur ruh ban thaw ïa ka rukom treikam kaba ïatreilang hapoh ka jingpynïaid jong ki Commissioner ka Transport jong ka Assam bad Meghalaya. Ki nongmihkhmat jong ki ar tylli ki associations kin iakynduh man ka por ban bishar bniah ia ki mat bad ban pynthikna ba ki nongpyniaid kin ym iakynduh jingeh haba ki treikam ha kano kano ka jylla.
U Dhar u la ong ba ia ki jingeh kiba iadei bad ki pulit, kynthup ia ka jingtalasi ia ki kali jong ki nongjngohkai pyrthei, yn sa pynbeit ruh lyngba ka jingiatreilang kaba kham bha hapdeng ki Pulit ka Assam bad Meghalaya.
Ha ka juh ka por u myntri na Assam u Atul Bora ula ong ba ka jingialang ka long kaba sngewtynnad bad ong ba ka jingmih ka jingbym sngewthuh jingmut kab amih hadien ka 19 tarik hapdeng ki association la dep pynbeit bad mynta ka jinglong jingman ka la iaid beit iaid ryntih ka bym don shuh ka jingiakynad na kano kano ka liang.
Haba kren halor ki middleman u Bora u la ong ba ka Assam dang shen ka la shim khia ia ki dalal kiba donkti ha kum kine ki kam.
U Anirban u nongialam ka Tourist Taxi Association na Assam u la ong ba ka sorkar Assam ka la dep ban ithuh ia ki jaka ban ai jaka ieng kali ia ki kali tourist ha kad liengsuin. U la ong ba ia ka mat ka bai pynieng kali pat ha Kamakhya railway station yn sa pynbeit.
U la ong ba baroh arliang na Meghalaya bad Assam ki don la ki jingeh bad abaroh ar tylli ki sorkar ki la shimkhia ban pynshitom ia ki dalal kiba la kynnoh ba ki donkti ban pyniaid ia ki kali tourist. Ia kane ka mat la khmih lynti ban lehb eiei hapoh 10 ne 15 sngi u la bynrap.
