Mawkyrwat Nailar 04: Ka skul Balang Mawlangwir Higher Secondary School , Mawlangwir ka la long ka lahduh ha ka lympung ïalehkai 7th South West Khasi Hills District Inter-School Badminton Championship 2026 ba la pynïaid da ka South West Khasi Hills District Badminton Association ba la pynlong hapoh ka Mawlangwir Indoor Stadium, South West Khasi Hills District.
Kum ban shu kdew ba ka Balang Mawlangwir Higher Secondary School, Mawlangwir ka long ka lahduh ha South West Khasi Hills District Inter-School Badminton Championship kata ha u snem 2018, 2019, 2025, bad ha u snem 2026 .katba ia ka nam Best Discipline Team la ioh da ka Little Star Higher Secondary School, Mawkyrwat.
Ha kaba kut jong ki jingïalehkai, na ka liang ka Association ka la ïoh ban sam ïa ki khusnam sha baroh ki nongjop kata kiba la wan ha ka kyrdan ba nyngkong bad kumjuh ruh kiba la wan ha ka kyrdan kaba ar.
Ia kane ka lympung la wan ban pynhap pyrda da u Bah Commander Shangpliang ,President Hill Farmers Union ha ryngkat ka jingdonlang u bah H.S. Diengdoh, President South West Khasi Hills District Badminton Association, ki nongïashimbynta na ki skul bapher bapher, ki nonghikai ha ryngkat ki nongkitkam jong ka South West Khasi Hills District Badminton Association (SWKHDBA).
