Shillong Nailar 04: Ka ophis jong ka Commissioner for Persons with Disabilities kaba dei hapoh jong ka tnat Social Welfare, jong ka sorkar Meghalaya ha ka jingiatreilang bad ka Secretariat Administration Department bad ka Trestle Labs Pvt. Ltd., Bengaluru, hynne ka sngi ki la pynlong ia ka prokram ba kyrpang halor ka phang “Assistive Technology and Digital Accessibility for Government Employees. Promoting an Inclusive Workplace for Employees with Visual Impairment.
Ha ba kren ha kane ka sngi na ka liang u Nongaibuit ka sorkar jylla u bah Paul Lyngdoh u la banjur halor ka jingdonkam ban don pynlong ia ki ophis sorkar ka jaka kaba baroh ki lah ban ioh jingtip bad ban ioh ruh ia ka jingshakri kaba bha tam khamtam haba ia dei bad kito kiba duna dkhot met.
U la ai khublei kyrpang ia ki nongpyniaid kiba la shim ia kane ka sienjam ban iarap ia kito ki nongtrei sorkar ki bym lah ban iohi ki khmat ba kin lah ban tip ia ki kot ki sla da kaba pyndonkam ia ki kor ki bor jong kane ka juk kaba mynta.
U la bynrap da kaba ong ba ngi dei ban kylla ia ka jingpeit ka jong ngi ia kito ki bym iohi ki khmat, da kaba u la ong ba tang ka jingiohi kam lah pynlong ia u ne ka briew ban iohi jngai ne ka jinglang ka jong ki. Ki don ki briew kiba don ia ki khmat kiba biang bha hynrei kim iohi satia. Katba kito kiba iohi malu mala ne ki bym iohi satia hynrei ki don ka jingiohi kaba kyrpang. U la kyntu ia ki nongtrei sorkar ban pdiang bad wanrah iakata ka jingiajan ha ki jaka trei kam jong ki.
Ha kane ka sngi la iohi ruh ia ka jingkren na u Secretary ka tnat SAD u Swapnil Tembe IAS uba la pynpaw ia ka jingtreikam jong ka tnat ha Secretariat bad ki sien jam ban pynsuk ia kiba duna dkhot met la ka dei ha ka lynti ka syngkien, ki jaka leit shabar bad ki wei kiwei.
U la ong ruh ba lada don kino kino ki jingai jingmut sha ka tnat, ki lah ban leh ia kata da kaba pyntip sha u khnang ba kin lah ban pynbha shuh shuh bad ban pynsuk ia kiba duna dkhot met haba ki wan sha secretariat bad sha ki wei ruh ki ophis sorkar.
