Shillong Nailar 04: Ka Sorkar jylla lyngba u Myntri rangbah ka jylla u Conrad K Sangma ka la sdang ïa ka program “Mission Clouded Leopard” kum ka dak ban iada ïa u Khla bad ban ithuh ruh kum u State Animal, ia kane ka jingpynbna lah pynbna paidbah ha ka sngi rakhe ia ka International clouded leopard day kata ha ka 4 tarik u nailar.
Katkum ka kyrwoh ba la phah lyngba ka Directorate of Information and Public Relation ka sorkar jylla la iathuh ba Kane ka prokram ka long halor ka jingthmu ba kan bud ïa ka Meghalaya Clouded Leopard Action Plan bad ong ruh ba ha ka jingwad bniah ka la lap haduh 21 tylli ki Khla Thapsim ha ka thaiñ Balpakram.
Shuh shuh ka jingthmu jong kane ka program ka long ban Pynkhlaiñ ïa ka jingïasnohkti bad ki shnong bad ki paidbah, ban wad bniah bad peit bniah ïa ki khla, ban pynneh ïa ki khlaw, bad kum juh ka Treilang bad ki jylla ba marjan ha ka thaiñ Shatei Lam Mihngi
Ka jylla Meghalaya ka dang don bun ki jaka kiba dang im une u mrad kum ha Nokrek, Balpakram, Baghmara, Narpuh bad Nongkhyllem
Ha Ka jingwad bniah la iathuh ba kumna 21 tylli ki Khla Thapsim ki don ha Balpakram. Ka Sorkar kan nang iai wad bniah sha kiwei pat ki jaka ban tip paidbah katno tylli ki Khla Thapsim ki dang don ha Meghalaya.
