Shillong,Nailur 14: U Myntri Rangbah ka Jylla Conrad K Sangma mynta ka sngi, ula sam ia ka song jingiarap ba mar T.20,000 sha ki nongshong dukan madan bala pynkynriah ia ki dukan sha Barik bad Dhankheti. Kiba iadonlang ha kane ka sngi ki long u Myntri ka Tnad Arts & Culture bah MLA ka South Shillong Bah Sanbor Shullai, MLA ka East Shillong Dr Ampareen Lyngdoh nalor ki Ophisar na ka Tnad Urban Affairs.
Haba kren ha ka jingsam ia ki cheque bad ka jingiakren bad ki nongshong dukan madan, u Myntri Rangbah Conrad K Sangma ula ong ba ka jingpynkynriah ia ki dukan madan kala urlong namar ka jingiatreilang jong man ki kynhun ba don bynta ha kane ka kam ban pynkynriah. “Watla ka lah ban I kum ka sienjam kaba suk bad kaba rit, ka dei kawei na ki kam ba tasam bha kaba ngi la mad namar kam dei eh tang halor ka roi ka par hynrei ka iasnoh bad ka kamai jakpoh jong ki briew bad ka jingpynitynnad ia ka sor” ula ong.
Ula pyntip ba ki jaka ba kongsan ha ka sor la ai lut sha ki nongshong dukan madan khnang ban pynthikna ia ka jingbiang tarajur hapdeng ka kamai jakpoh ki nongshong dukan madan bad ka jingitynnad jong ka sor bad ki surok bad lynti iaid.
Ula kyntu ia ki nongjngohkai bad ki nongshongshnong ba kin leit sha kine ki jaka shong dukan madan haba pynthip ba yn sa nang kyntiew kyrdan ia kine ki jaka shong dukan madan da ki jingput jingtem man ka janmiet ne Live music evenings, ki jaka leitbar, ki jaka shong, ki jingpyndait ia ki bording bala pynitynnad, khnang ba baroh kin lah ban pynlut por ha kine ki jaka.
Kane ka song jingiarap ba T.20,000 ka long ban kyrshan ia ki nongshong dukan madan ban iarap ha ka por ba ki pynkynriah ia ki dukan. Ki nongshong dukan madan kin ioh noh ia ka song jingiarap ba T.10,000 lyngba ka Direct Benefit Transfer bad ka jingiarap ba T.2000 shibnai ha kine ki san bnai ban wan.
