DAWA KA AKHAJAC NA KA SORKAR BAN PYNTREI KAM IA KA KTIEN GARO HA KA THUNG KAM HA BAROH KI DISTRICT HA KA JYLLA

Shillong Sept 24: Ki Nongialam jong ka All Khasi Hills A’chick Joint Action Committee hynne ka sngi ki la leit ban ia kynduh ia u Chief Secretary ka Jylla ban ia kren halor ka thung kam thung jam ha ki district bapher bapher.
Haba ia kren bad ki nongthoh khubor u General Secretary of All Khasi Hills A’chick Joint Action Committee u John Sangma u la iathuh ba ki la wan sha secretariat ban ia kynduh ia u Chief Secretary ha kaba u la pynpaw ba kane ka mat ka dei kaba don kam bad kin sa peit bniah ia ka.
U la iathuh ruh ba hadien ka jingiakren na ka liang u CS ula ai jingmut ban ia kynduh ia ka kong Isawanda Laloo kaba dei ka nongpeit ia baroh ki DSC, ka kynhun ka la iakynduh ia ka kong Laloo ha kaba ka la ai ka jingkyrmen, namar baroh tylli ki ktien kata ka Khasi bad Garo ki la long ki official Language mynta ka la kham suk ban peit.
U la iathuh ruh ba ka kynhun ka la lum ia ka jingialang paidbah ha kine ki sngi kiba la dep ha Malangkona bad ka wei pat ha Shallang ha kine ki sngi ki ban wan, ka kynhun ka don ruh ia ka jingthmu ban rung ha man la ki shnong kiba ki paidbah Garo ki shong ki sah ha Khasi hills, hadien kata kin sa ia kynduh ia u Myntri Rangbah ban pynbeit ia kane ka mat.
Shuh shuh u Secretary ka All Khasi Hills A’chick Joint Action Committee u la ong ba ka ktien Garo dei ban pyntrei kam ha man ki district bad kam dei ban long tang ka Ktien Khasi namar ki Garo bad ki Khasi ki dei ki nongshong shnong ba pura jong ka jylla Meghalaya.
“ Ha man ki District Selection committee tang ka ktien Khasi ka long kaba don kam ha Khasi Hill, ka Kynhuh ka kwah ba baroh ar tylli ki tien ki dei ban dei ha man ki district, ngim leilei lada ia ka Ktein Khasi kin leh ha Garo Hills,” u la ong.
U la bynrap da kaba ong ba ngi tip ba ki Khasi kiba sah ha Garo Hills ki duna hynrei lada ia kren ia ki Garo kiba shah sha Khasi Hills ki Garo ki don kumba 4 ne 5 lak ngut. Ngi kwah ba ka sorkar ka dei ban sngewthuh ia ka jingsngew jong ki paidbah Garo ki ba shong ba sah ha Khasi Hills.
U Sangma u la kynnoh ruh ba ka sorkar kala lehbein ia ki paidbah Garo kiba shong ha khasi hills, u la ong ruh ba ka kynhun kan sa ia kynduh ia baorh 24 ngut ki MLA na Garo Hills bad ruh ia ki MLA na Khasi Hills ban pan jingkyrshan halor kane ka jingdawa ka jong ki.