Mawkyrwat Risaw 11: Ka jingpynpoi um bam umdih ka Sorkar sha man ki thliew iing lyngba ka skhim JJM imat ka kylla long tang ka rymphong ban shu pyni pyrthei.
Ka Shnong Jakrem naduh ba ioh ia ki kor um sha ki iing ki sem haduh mynta kim ioh um satia.
Ki Nongshong Shnong ki la pynpaw ia ka jingsngew diaw ba naduh ba la ioh ia ki kor um ha ki iing ki sem ki ioh Um tang katno katne taiew hynrei hadien kata kim shym la ioh um shuh.
” Ki kor um ki tyrkhong bad ki la shu Sniew ei tang ba ka um te kim ioh,” ki la ong.
Shuh shuh ki Nongshong Shnong ki pynpaw ba haba ki pyrshang ban kylli kaei ka daw ba kam poi um, ki la iathuh ba ki nongpeit ki pynpaw ba kata ka pump kam long. Kaba sngew lyngngoh shuh shuh ba da ki snem kata ka pump kam long bad imat kam don kata ka jingpynbha ia ka.
Ka jingbym poi ka um kumba la thmu ban pynbiang um bam um dih sha ki iing ki sem ka ktah Shibun ia ki paidbah namar bun ki ap ia ka um na kine ki kor um.
Ki la buh jingkylli ruh balei ka tnat PHE kam leh eiei halor kane ka jingsniew jong ka Pump kumba la kam. Lada Sniew ki la dei ban thied noh da ka wei ne ban pynbha ia ka.
Ngi iohi ha ki lad pathai khubor ba ka tnat ka la leit ai ia kita ki khusnam sha kita ki Shnong ba kane ka skhim JJM ka la lah ban pynpoi um, phew ha Shnong ba ka ophis ka don ki paidbah kim ioh um satia.
Ki paidbah Nongshong Shnong ki kyntu ia ka tnat PHE ban peit lem ia kane ka jingeh kaba ki paidbah ki mat bad shim khia lem ban pynbiang um bad pynbha ia kita ki pump lada ki la Sniew kumba ki la kam.
