Shillong Naitung 20: Ki Samla Pule na Nongbah Shillong hynne ka sngi ki la pynlong da ka jingiakhih kaba jarjar ha Don Bosco Square halor ka jingsngap mynti jong ka sorkar pdeng haba ia dei bad ka jinglait tuh jong ki jingkylli jong ka Eksamin NEET bad kum juh ruh ban ai ka jingkyrshan ia ka jingshah thngan jong u Sonam Wangchuk ha Jantar Mantar Delhi.
Ha kane ka sngi ki samla pule ki la rah da ki Placard ha ryngkat ki jingthoh kiba kynthup, “’All is not well’, ‘Students died because the system failed them’, ‘ We stand with the youth at Jantar Mantar.
Haba kren ha kane ka sngi ki samla pule ki la ong ba ka jingwan shim byn ta jong ki ha kane ka jingiakhih ba jar jar ka dei ban ai jingkyrshan ia u Sonam Wangchuk uba iakhih ha Jantar Mantar, ha kaba haduh mynta ym pat don kaei kaei kaba ka sorkar kan kren eiei halor kane, phewse ki la wan ban rah da ka bor pynban ia u. Ngam lah ban don lang hangto hynrei ngi ai ka jingkyrshan kaba pura haba ia dei bad kane ka jingiakhih ki samla pule.
Ka wei ka kmie jong ki samla pule kaba wan ban ia shim bynta lang ka la ong kane ka jingiakhih hangne ka dei ka juh ka daw kata ka dei na ka bynta ka jingdawa jong ki samla pule, ban don ka jingkit khieh na ka sorkar haba ia dei bad kane ka jinglait tuh ki jingkylli ha ka Eksamin NEET.
Ka la bynrap da kaba ong ba ka sorkar ka la lehbein bad kam shym la lah ban peit iaka jingeh jong ki samla pule bad ban pynbiet ia ka, na ka bynta ka jingmyntoi ki samla bad ka lawei ka jong ki.
U wei pat u samla pule u la ong, ka jingrah jubor ia u Soman na ka jaka kaba u shong ban shah thngan kam dei ka lynti kaba dei, u la ong ba ki don ka jingkyrmen ba u Sonam Wangchuk un ioh bor biang bad un lah ban wan biang ban ia shim bynta namar ka Ri Ka don kam ia kum kine ki rangbah kiba iohi jngai.
U la ong ruh ba haduh mynta ka sorkar ka sngap jar jar kam pat kren eiei , ki don ka jingkyrmen ba ka sorkar kan kren da kaba shai haba ia dei bad kane ka mat.
Shuh shuh ha kane ka sngi ki nongialam jong ka seng Congress hapoh ka jingialam jong u bah L Nongkhlaw ki la wan ban ai jingkyrshan ia kine ki samla pule ban dawa ia ka hok haba ia dei bad ka jinglait tuh jong ki jingkylli .
Haba kren ha kane ka sngi u bah Nongkhlaw u la ong ka congress kan ai ka jingkyrshan ba pura halor kane ka jingiakhih jong ki samla pule bad dawa ia u myntri ba dei peit ia ka tnat pule puthi ban shim ia ka jingkit khlieh bad ban iehnoh kam shi syndon kum u Myntri ka tnat pule puthi.
U la ong ruh ba kane ka jinglait tuh jong ki jingkylli ka buh ia ki kmie ki kpa ha ka jingeh namar ki la pynlut shibun ka pisa ha ki jingdonkam jong ki khun ki kti, khamtam ki khun ki la pynlut ia ka bor ka sor jong ki ban pynkhreh ia lade hynrei ka jingbym shim khia jong ka sorkar ka buh ia ki ha ka jingartatien.
U bah Nongkhlaw u la ong ba ka Congress kan iaid don bad ki samla pule bad kan iarap ia ki, ha ki lynti iaid ka jong ki ban ioh ia ka hok. U la ong ba ka Congress kan pyrshang ban wan rah biang iakata ka jingshaniah na ki samla pule kaba kane ka sorkar ba mynta ka la buh ha ka jingma.
