Mawkyrwat, Naitung 20: Ki paidbah shnong Jakrem kiba wad tit ha ka noh phai sngi jong ka 20 tarik u Naitung 2026 ki la lap noh ïa ka met jong ka kong Joit Kharlyngdoh kaba la jah naduh ka janmiet jong ka 4 tarik u Naitung 2026 na kawei ka khlaw kaba hap hapoh ka shnong Jakrem kaba tip kum ka Krem Motbih Pamske.
Lah ban kdew ba ka Joit Kharlyngdoh, 76 snem karta na ka shnong Jakrem, South West Khasi Hills District ka la kynjoh mynta la 16 sngi naduh ba ka la jah bad naduh katei ka por ka khlem wan phai ïing shuh.
Katkum ka jingïathuh jong u Myntri Shnong Jakrem, u bah Pascal Wahlang u la ïathuh ba naduh ba ka la jah, kum ka shnong ki la la mih paidbah ban wad ïa ka naduh katei ka sngi ha ryngkat ka jingïatreilang bad ki bor pulit .
U la ïathuh ruh ba ha ka 15 tarik mynta u bnai, ki paidbah nongshong shnong ryngkat ka jingïatreilang bad ki bor pulit ki la pyrshang ban phah wad lyngba ki ksew kiba la shah hikai hynrei kim la lap satia ia ka bad dei tat ha ka janmiet jong ka 20 tarik mynta u bnai ha ka por kumba 2:30 eiei la lap noh ia ka Kong Joit Kharlyngdoh da ki Briew kiba wad tit ha kaba ki la pyntip
mar mar sha ki bor shnong bad pulit bad ka jingtohkit halor kane ka jingjia ka la iaid shakhmat.
