Shillong, Nailar 07: U Myntri Rangbah Conrad K Sangma mynta ka sngi ula shong bishar kam halor ka jingiaid shaphrang jong ka “Wad ia ki Tynrai”, ka jingwad bniah ia kiba bun ki bynta, bala leh da ka Tnad Arts & Culture kaba thmu ban buh jingthoh bad wad bniah ia ka khana pateng (histori), ka ktien thylliej, ka kolshor, ka jinghiar pateng bad ka roi ka par jong ki paid riewlum trai muluk ka Meghalaya.
Ha kane ka jingialang, u Myntri Rangbah ula pynlong ia ka jingiakren kaba bniah bad ka Committee kaba la thung ban ialam lynti ia ka jingwad bniah bad ban shong bishar ia ki lynti na ka bynta ban pyntreikam ia kane ka prokram.
Kane ka sienjam kan shim ia ka rukom treikam ba bun jait, kaba pyniasoh lang ia ka jingwad bniah kat kum ka histori, ka jingiathuh khana ia ki pateng, ka jingstad ki trai ri trai muluk, ka ktien ka thylliej, ka jingwad bniah ia kiei kiei kiba rim, ka jingbatai ia ka dustur kat kum ka jingstad saian, kynthup ia ka snam ba ki hiar pateng, ban shong bishar ia ki khana kiba iadei bad ki jaka tynrai bad ka jingkrih jaka jong ki jaidbynriew trai muluk ka Jylla.
Ka project kan buh jingthoh ruh ia ki bor treikam nala tynrai, ki tamasa, ki kolshor bad ka jingim ka ktien ka thylliej, haba pynrung ruh ha ki kor digital na ka bynta ki pateng ban dang wan.
Kum shibynta jong kane ka sienjam, la buh mynta ia ka rynsan digital ba kyrpang ban buh jingthoh ia kiei kiei kiba shem katba nang iaid ka jingwad bniah, ban pynneh pynsah ia ki lad jingtip bad khot iashimbynta lang ki paidbah ha shilynter jong ka project.
U Myntri Rangbah ula pynpaw ba kane ka sienjam ka dei kaba thmu ban tei ia ka jingsngewthuh kaba khlain bad ba don ki sakhi sabut ban pynshisha ia ka pateng jong ki jaidbynriew trai muluk ka Jylla haba pynneh pynsah ruh ia ki khanatang bad ki riti dustur nala tynrai.
Ki Ophisar kila pyntip ba ki jingpynkhreh mynta kila nang iaid naduh u bnai Rymphang, kynthup ka jingthung ia ka Kynhun leh Research bad ka jingthaw ia ki kyndon treikam jong ka project. Kane ka sienjam kan kynthup ia ka jingiatrei lang bad ki jaka pule ba pawnam ka Ri bad Bar Ri ba kin shim ia ka jingwad bniah ba ianujor shaphang ki histori, ka ktien thylliej bad ka kolshor katba dang pynmih ia ki kot pule, ki tiar hikai bad ki jaka buh jingtip ba bniah ha ki kor digital.
