Shillong Jylliew 28: Ka Meghalaya ka la lah ban jam sha u mawmer ba kongsan ha ka rukom sumar ia ka jingpang klongsnam katkum ki jingsumar ka juk ba mynta da ka jingjop ha ka sien ba nyngkong ban leh ia ka Transcatheter Aortic Valve Implantation (TAVI) da kaba pyndonkam ia ka MYVAL Transcatheter Heart Valve System ba la pynmih da ka Meril Life Sciences. Ia kane ka jingsumar la lah ban pyndep da kaba jop da u Dr. Synrang Warjri, ryngkat bad I doktor sumar klongsnam batbit ne I heart specialist I Dr. Joy Shome iba long kum I ba ialam ha khmat, ha kaba la lah ruh ban wanrah ia ka rukom sumar kaba tam na ka bynta ban sumar klongsnam bad ia kane ka rukom sumar la lah ban wanrah shajan jong ki nongpang ha ka thain. Kane ka jingjop ka kdew ia ka bynta ba kongsan Jong ka jingkiew ka Meril Life Sciences ban nang kyntiew ia ki buit thymmai ha ka liang ka jingsumar ba la sdang na la ka Jong ka ri bad nang pyniar ia ka jingsumar ia ka jingpang klongsnam ha ka rukom ba bha tam ha kylleng ka ri India. Kane ka jingjop ka pyni ia ka sienjam ba kyrpang jong ka jingiaid sha khmat ha ka rukom ai jingsumar ka Meghalaya bad ka pyni ruh ia ka jingkylla kaba khraw ha ka jingai jingsumar.
Ka TAVI kadei ka rukom sumar kaba donkam ban puid tang khyndiat na ka bynta ban sumar ia kito ki nongpang kiba la jur bha ka jingpang aortic stenosis, kaba long ka jingpang kaba ap jingma ia ka jingim kaba ktah ia ki thied ne valve jong u klongsnam. Da ka rukom sumar kaba ju leh naduh ki por mynshwa haba kum kane ka jingpang la hap beit ban puid heh ne open-heart surgery, hynrei da kane ka rukom sumar kaba mynta ka long kaba shngain bad ym donkam ban puid heh na ka bynta kito ki nongpang kiba lah ban ioh ia kane ka jingsumar, bad kane ka wanrah ruh ia ka jingkoit kaba kham sted bad ka jingsumar ruh kaba kham bha. I Dr. Joy Shome, Senior Consultant Cardiology bad Head jong ka TAVR/TAVI, I ong,
“Ka jinglah ban pyndep da kaba jop da ka Meghalaya ia ka jingleh ia ka jingsumar TAVI kaba nyngkong ka pyni ia ka jingkiew ha ka liang ban ai jingsumar bad ka jinglong ba la pynkhreh da ki kynhun jong ki nongsumar ha ka thain shatei lam mihngi ban ai ia ki jingsumar kiba katkum ka juk ba mynta na ka bynta ban sumar ia ki jingpang klongsnam. “
