Shillong, Jylliew 5: Ka ophis jong ka Commissioner for Persons with Disabilities , ka Social Welfare Department, jong ka sorkar Meghalaya,ha ka jingiatreilang bad ka Pt. Deendayal Upadhyaya National Institute for Persons with Physical Disabilities (Divyangjan) jong ka Ministry of Social Justice and Empowerment, Government of India, bad ka Instalimb India Pvt. Ltd, hynne ka sngi ki la plie paidbah ia ka jingai jinghikai kaba ar sngi halor ka “Hands-on 3D Prosthetic Training na ka bynta kito kiba la duh noh ia ki kjat jong ki ia kane ka program la pynlong ha U Soso Tham Auditorium, Shillong.
Ha kane ka sngi ki riew shempang na kylleng ka thain shatei lamihngi ki la wan ban ia shim bynta bad ban sngewthuh bha halor kane ka jingai jinghikai ia ka rukom pynwan dur ia kine ki kjat.
Ha kane ka sngi sdang la wan ban ia don bynta lang ruh da u Myntri ka tnat Arts and culture jong ka sorkar jylla u bah Sanbor Shullai; u Commissioner and Secretary ka tnat Social Welfare u Pravin Bakshi; u Managing Director bad Chief Operating Officer ka Instalimb India Pvt. Ltd. U Shoichiro Adachi; ha ryngkat ki wei ki ophisar sorkar bad ki ba la shah khot sngewbha.
Haba kren ha kane ka sngi na ka liang u bah Sanbor Shullai u la ong ba ka jingiatreilang ban wan rah ia ka bor ban pynbiang ia ka jingdonkam bad ban ai jingshakri ia kine ki ba don kam jingiarap ka long kaba don kam bha. Ka don kam ruh ban ia kyntiew lang yn tang na ka bynta ka jylla hynrei na ka bynta ka thain shatei lamihngi hi baroh ka wei. U la ia khublei ia ka ophis u Commissioner for Persons with Disabilities, ka State Council for Science, Technology and Environment, bad ia baroh ki ba la don bynta lang ban pynlong ia kane ka sngi kaba iaid beit iaid ryntih.
U la ong ba ka jingiatreilang hapdeng ka sorkar bad ki jaka ai jinghikai, ki jaka ban peit ban sumar bad kiba noh synniang kan long ka jingmyntoi khamtam ia ki briew kiba mat ia kane ka jingeh. U la ai ka jingiaroh ia ka Instalimb India Pvt. Ltd. Kaba la noh synniang shibun, khamtam ban pyndonkam ia kine ki 3D scanning, digital design, artificial intelligence and advanced manufacturing techniques ban ai jingiarap ia kito kiba shitom.
U bah Sanbor u la ong ba kum kine ki lad jingtip ba thymmai ki long ki ba donkam shibun u la banjur ia ka ka jingiatrei lang u la ong ruh ba ka jingiatreilang ban ai jinghikai ha ka koit ka khiah ka long kaba don kam bha.
U la ong ruh ba kum u nongmihkhmat uba wan na ka long iing ka sem duk u sngewthuh bha ia ka jingeh kaba ki paidbah ki ia kynduh, khamtam kito ki ba duna dkhot met. U la ong ba ka sorkar jylla bad ka sorkar pdeng ki kular ban shimkhia ban pyntrei kam ia ki skhim bad ban ai bor ia kiba duna dkhot met ha ka imlang ka sahlang.
