Mairang 23: U MLA ka Mawthadraishan u bah Shakliar haka 22 tarik u la leit ban jurip ia ka jaka ban pynlong ia ka Markham Festival kaba ar ha Markham valley ia ka ba la pynbeit ba kan long ha ki tarik 16 bad 17 Risaw, 2026. Ha kane ka jingjurip la ia donlang ka Deputy Commissioner, Eastern West Khasi Hills District, kong Anita Kharpor IAS, U Superintendent of Police, ki ophisar sorkar na ki tnat treikam bapher bapher, ha ryngkat ki nongialam shnong jong ka shnong Markham bad ki nongmihkhmat na ka Kur Lyngdoh Nonglait.
Haba ai jingkren ha kane ka jingjurip, na ka liang u MLA u la pynpaw ka jingkhublei ia baroh ki ophisar sorkar ki ba la shim khia ban pynbit pynbiang ia ki jingdonkam ha ka ban pynkhreh ia kane ka festival. U pynpaw ruh iaka jingsngewburom bad ai khublei kyrpang ia ka Kur Lyngdoh Nonglait bad kumjuh ia ka shnong Markham ki ba la mih shakhmat ban ai ka jingkyrshan ha kaba iadei bad kane ka jingpynlong ia kane ka festival. U MLA u la ong ruh ba ka Markham Festival kam shym dei tang ka jingpynpaw pyrthei ia ka jingitynnad jong ka sawdong sawkun jong ka jaka, ne ban pynithuh ia ka culture ne ki jait jingbam, hynrei ka jingthmu hi ka long ba lyngba ka jingpynlong ia kane ka festival kan plielad plie lynti ha ka ban kyntiew ia ka kam jngohkai ha katei ka jaka, khnang ba kan lah pat ban kyntiew ia ka ioh ka kot jong ki nongshongshnong lyngba ka jingwan jong ki nongjngohkai pyrthei bad ruh kan long ka kabu na ka bynta kiwei pat ki kam pynroi ha ka dong bad ka thain. U la kyntu ia ka mynsiem iatreilang na baroh khnang ban lah ban pynlong iaka ne ka festival ka ba jop.
