Shillong Naitung 31: Ka Business Advisory Committee ka Meghalaya Legislative Assembly ha ka sngi Thohdieng ka la mynjur ban pynlong ia ka dorbar Synrai ka ban sdang ha ka 24 tarik bad kan kut haduh ka 28 tarik Nailar 2026.
U Speaker ka iingdorbar thawain ka jylla u Thomas A Sangma haba kren sh aki lad pathai khubor hadien ka jingialang ka BAC u la ong ba ka komiti ka la mynjur ia ka jingtyrwa ia kine ki tarik.
Ha ka jingialang la donlang u symbud myntri rangbah ka jylla Bah Prestone Tynsong uba dei peit ia ka tnad Parliamentary Affairs, u nongialam ka Liang pyrshah u Dr Mukul Sangma, u Chief Whip ka Liang pyrshah u Bah Charles Pyngrope, u Secretary ka Meghalaya Legislative Assembly u Malthus S Sangma bad kiwei ki dkhot.
U Lamphang u la ong ba ha kane ka dorbar ba 5 sngi kan kynthup 3 sngi na ka bynta ka Government Business bad 2 sngi na bynta ki Private Members’ Business.
Haba kren halor ka jinglyngkot jong ka por u Thomas Sangma u la pyntikna ba un ialeh katba lah ban ailad ia ki dkhot ka liang synshar bad ka liang pyrshah ruh ba kin ia ioh lang kajuh ka lad ban rah ia ki mat ba donkam na ka bynta u paidbah.
U Lamphang u la ong biang ba baroh ki dkhot kiba wan ha ka jingialang ha ka Business Advisory Committee ba kynthup u nongialam ka liang pyrshah ki la mynjur lang ia kane ka jingtyrwa na ka bynta ban pynlong ia ka dorbar synrai.
