Shillong, Naitung 27: Uwei u rangbah uba la tip kyrteng kum u Shanbor Rani, uba dei na Nongmynsong Lumshyiap, u la kynnoh ba la rahbor bad shah pyniap dusmon ha Mawdiangdiang ha ka miet Sngi U Blei.
Ia ka met jong u Rani la lap harud surok kaba leit sha Larity, Mawdiangdiang, Shillong, ha ka step jong ka Sngi Nyngkong. Katkum ki khubor, ki briew kiba iaid lynti ki la lap ia ka met, kaba la tap da ka snam, katba ka dur khmat jong u ka la mynsaw jur haduh ba ym lah shuh ban ithuh.
Katkum ki tyllong khubor na ki pulit, hynriew ngut ki briew kiba ym pat lah ban ithuh ki la kynnoh ba ki la pynbor ia ki lai ngut ki rangbah ban rung sha ka taxi kaba don ia u nombor ML 05 AH 3636 bad rah ia ki sha ka liang Mawbeh. La kynnoh ba ia u Shanbor Rani la dung da ka wait bun sien haduh ba u la khlad noh na ki jingmynsaw.
Uwei pat na ki lanot u la mynsaw jur bad la pynkit noh ia u sha North Eastern Indira Gandhi Regional Institute of Health and Medical Sciences (NEIGRIHMS) ban ioh jingsumar. Katba uwei pat u briew u la ioh lait da kaba la kynnoh ba u la kynthih noh na ka kali. Hadien kata, la lap ia u da ki shipai BSF bad la pynkit noh ia u ban ioh jingsumar.
Ia ka met jong u ne u Rangbah uba we la khlad la rah sha NEIGRIHMS ban leh ia ka post-mortem.
Ka pulit ka la sdang ban tohkit halor kane ka jingjia ban lap ia ka daw tynrai jong ka jingrahbor bad jingshah pyniap, bad ruh ban ithuh ia kito kiba donkti ha kane ka kam.
