New Delhi Naitung 23: Ka iingbishar bahakhliehduh ha ka ri ka Supreme Court ka la pyndam noh ia ka jamin ba la ai da ka lower Court kaba la pynksan da ka High Court Meghalaya ia ka Sonam Raghuvanshi kaba kynnoh donkti pyniap ia u kurim u Raja Raghuvanshi.
Ka Supreme Court kala bthah ïa ka Sonam Raghuvanshi ba kan wan aiti biang ialade hapoh 2 taiew.
Ka ïingbishar u Justice MM Sundresh bad PB Varale ki la pynpaw ba lada ka Sonam ka iai don shabar ka phatok lyngba ka jingioh jamin kan sa pynslem ia ka jingbishar. Kumta ka Supreme Court ka la pyndam ia ka jamin ba la ai sha ka Sonam bad bthah ia ka ba kan leit aiti biang ialade hapoh 2 taiew.
Hynrei ka Supreme Court ka la ong ba lada ka jingbishar kam dep hapoh 6 bnai ka Sonam ka lah ban pan jamin biang.
“Ngi la pyrkhat ba ka jingbteng buh ia ka Sonam ha ka jingpyllait jamin ka lah ban pynslem ia ka jingbishar. Namar kata ngi la rai ban pyndam shwa ia ka jamin ban ai ia ka Sonam. Ia Ka nongshah ujor yn ai por 2 taiew ba kan wan pyndem. Lada ka jingbishar kam dep hapoh 6 bnai ka nongshah ujor ka lah ban pan jamin biang,” la ong ka iingbishar.
