Shillong Naitung 24: U MLA ka North Shillong u Bah Adelbert Nongrum u la Khublei kyrpang ia u Samla Kitkupar Nongsiej halor ka jingjop jong u ha ka World Championships of Performing Arts (WCOPA) 2026 kaba la long ha Las Vegas, United States of America.
U bah Nongrum u la ong ba Ka jinglah jong u Samla Nongsiej ban khur haduh lai tylli ki takma ksiar (Gold Medals), ar tylli ki takma rnong (Bronze Medals), bad ka First Place Scholarship Award ka dei ka jingjop kaba khraw shisha kaba pynpaw ïa ka sap kaba kyrpang jong u. Kane ka sakhi ia ka jingaiti lut, ka jingtrei minot bad ka jingtrei shitom kaba kum u samla u la leh da ki snem ha ki jingiakob ki bapher bapher bad mynta u la ioh ban kheit ia u soh jong ka jingjop.
Ka jingmihkhmat ïa ka Ri India kum u nongïashim bynta uba tang marwei na ka ri ha kane ka jingïakob bad ban poi shaduh kane ka thong ka long kaei kaei kaba wanrah burom ïa ka ri bad ka jylla hi baroh kawei bad kadei ruh ka bynta kaba pynsngewsarong ïa ngi baroh.
Kane ka jingjop jong phi ka long ka jingsarong ym tang ïa ka jylla Meghalaya hynrei ïa ka thaiñ Shatei Lam Mihngi bad ïa ka Ri India hi baroh kawei. Da kane ka jingjop, phi la pyni sha ka pyrthei ba ka Meghalaya bad ka thaiñ Shatei Lam Mihngi jong ka Ri India ba phi don ïa ka sap bad jingtbit ban ïakhun bad ban jop pyrshah ïa kiba tbit tam ha ka pyrthei. Phi la long ka nuksa kaba bha bad ka jingai mynsiem ban pyrshang bad trei shitom ïa ki samla kiba don ka jingangnud ban poi sha ki thong kiba kham shalor.
Na ka liang u Bah Adelbert Nongrum bad ki paidbah ka Constituency ki ai ka jingïaroh bad ka jingaikhublei kaba kitbok kitrwiang bad ki jingkyrkhu kiba bha tam sha u samla Nongsiej.
” To ai ba kane ka jingjop kan long tang ka jingsdang jong shibun kiwei pat ki jingjop kiba kham khraw ha ka lawei. To bteng ban tyngshaiñ ha ka kam jong phi bad ban long u nongmihkhmat uba pynsngewsarong ïa ka jylla Meghalaya bad ïa ka Ri India” u la ong.
U la bynrap da kaba ong ai ba U Blei un nang kyrkhu ïa phi da ka bor, ka jingstad bad ka jingïalam lynti, bad un ai ba phin nang wanrah shuh shuh ïa ka nam, ka burom bad ka jingsarong ïa ka jylla jong ngi bad ïa ka Ri India.
