Shillong Naitung 21: Ka jingnoh ki wire ha kylleng ka nongbah Shillong ka buh jingma ruh ia ki paidbah kiba leit ba wan khamtam lada iaid ha ki por mynmiet. Ki Nongjngoh kai Pyrthei haba ki wan sha Meghalaya ka jaka kaba nyngkongeh kaba ki wan kan dei ka Khyndai Lad bad ki da iaroh ruh ia ka jinglong ka, hynrei ka jingnoh jong kine ki wire ka pynduh noh ia ka jingitynnad jong ka.
Haba ia kren bad u General Secretary jong ka BJP Meghalaya u bah Wankitbok Pohshna halor ka jingnoh kine ki wire ha kylleng sawdong ka nongbah u la ong ba dang shen u Myntri Rangbah ka Jylla u Conrad Sangma u la pynbna ban phah weng noh iakito ki wire ki bym trei kam bad kiba la shun oh bad pynwit ia ki paidbah ha ka iaid ka ieng.
U la ong ruh ba kane ka kam ka la iaid sha khmat ban pynkhreh ia ka jingwan ka National Games, bad ki la pyrshang hynrei kaei kaba don kam ka long ba kum ka nongbah kam dei shuh tang ban pynkhat ban weng ia kine ki wire kiba wit hynrei ki la dei ban don ka plan ban iaid kham sha kmat ban peit kumno ban pyniaid la ka dei ia ka Bording ne kine ki wire.
U la ong ruh ba ka jylla Assam mynta kala pyrshang ban pyniaid napoh khyndew ia kine ki wire baroh khoit bad ka jylla jong ngi ruh ka lah ban long lada ka sorkar ka shim khia khgam tam ha ki jaka kiba ki nongwan jngohkai pyrthei ki wan, kum ha Khyndai lad, Laitumkhrah bad ki wei ki jaka ba marjan. U la ong ruh ba ngi ju iohi ba man ka por haba wan u slap, lyer bad ka jinghap dieng ka pynthud ia ka bording bad lada iaid da ka plan ba thymmai kan long kaba biang. Kan don ka jinglut hynrei lada pyrkhat pat ia ka jingitynnad ka don kam ban peit ia kine ki lad, kam dei ban pyrkhat tang na ka bynta ka National Games hynrei ka dei ban pyrkhat na ka bynta ki por ki ban wan.
Shuh shuh u la iathuh ruh ba ha India ki la pyrshang ia kane bad ka Chandigarh kadei ka wei na ki nongbah kiba ki la leh ia kane , ki wei ki nongbah ruh ki la pyrshang kam dei ka basuk hynrei lada ka sorkar ka don ia ka jingthmu ka lah ban lum ia ki tnat bad ia kren kane ka lah ban long. Ki wei ki Ri lei ki la leh ia kane bad ka long kaba itynnad bha, ka rukom pynshong ia ki post light ruh ka itynnad bha.
U bah Pohshna u la ong ba ka seng kan sa ai jingmut sha ka sorkar haba ia dei bad kane bad ban pyntrei kam khang ba ka nongbah Shillong kan long kaba itynnad ym tang kata ki dei ruh ban pyntrei kam ha ki District Headquarter ruh.
