Shillong Nailar 25: U Myntri ka tnat jngohkai pyrthei ka sorkar jylla u Timothy D. Shira haba ia kren bad ki nongthoh khubor halor ka long ka man ha ka kam jngohkai pyrthei u la ong ba ka jingpakhang surok ha kine ki sngi ba la dep ka la ktah bha ia ka kam jngoi kai pyrthei bad ia ka ioh ka kot jong kiba trai hotel bad ki iingbasa.
U Myntri u la iathuh ruh ba ka don ka jinghiar haduh kata kata ia ka jingwan jong ki nongwan jngohkai pyrthei , da kaba ong ba kane baroh ka dei na ka daw ba ka don ka jingpakhang surok.
“ Kam don ka jingwan ki nong jngohkai pyrthei. Kumno kin wan haba ia ki surok la khang lynti,” la ong u Myntri.
U la ong ruh ba halor kane ka kam, ki arngut ki Myntri rangbah ka jylla kila ia kren ban ia pynbeit, u la ban jur ba kum kine ki jingjia kim dei bam jia shuh ha ka jylla kum ka jing pakhang lynti namar ka ktah ia ka leit ka wan jong ki kali jong ki ar tylli ki jylla.
U la ong ruh ba ki kali kiba don ia u register jong ka Jylla Assam bad ki kali dei ban shah ban wan sha ka jylla Meghalaya ku,juh ruh ki kali na Meghalaya dei ban shah ia ki ban rung sha ka jylla Assam.
U la ong ruh ba ka sorkar Meghalaya ka la mynjur ban siew bai lutksan ia ki kali ki ba shah pynjulor ha ka jingjia kaba dang jia shen bad u la ong ruh ba u kyrmen ba kum kine ki jingjia kin ym jia shuh hapdeng kine ki ar tylli ki jylla.
Haba ia dei bad ka jingshah ktah ki hotel bad ki Iingbasa u Myntri u la ong ba ka sorkar kan ym siew bai lut ksan na ka daw jong ka jinghiar ka ioh kot.
U la kyntu ia ka shong suk shong sain na ka bynta ka jingiaid beit iaid ryntih jong ki kali kamai, u Shira u la kyntu ia ki paidbah jong ka jylla Meghalaya ban long kiba husiar bad ban peit ioh kan wan kyrtoh sha lade na ki kam kiba ki leh ha ka jingiadei bad ka jylla Assam.
